મુલુંડના મોટા ભાગના ફાયર-હાઇડ્રન્ટ્સ નકામા

Published: 26th September, 2012 08:16 IST

મુંબઈના મંત્રાલયમાં આગ લાગી ત્યારે થયેલી જાનહાનિ માટે એક કારણ એ પણ હતું કે આવી ઘટનાના સમયે પરિસ્થિતિ પર નિયંત્રણ મેળવવા માટે લગાવવામાં આવેલા ફાયર-હાઇડ્રન્ટ્સ કામ કરતા નહોતા. મંત્રાલયની આગ બાદ શહેરમાં રહેલા બધા ફાયર-હાઇડ્રન્ટ્સનું સર્વેક્ષણ ચાલુ કરવામાં આવ્યું છે.



ફાયર કન્ટ્રોલરૂમના ડેટા મુજબ આખા મુંબઈમાં લગભગ ૧૦,૮૪૦ ફાયર-હાઇડ્રન્ટ્સ છે, પણ એમાંથી કેટલા નકામા છે એ શોધવાનો પ્રયાસ ચાલી રહ્યો છે. મિડ-ડે LOCALએ મુલુંડ વિસ્તારમાં કરેલા સર્વે મુજબ ૭૦થી ૮૦ ટકા ફાયર-હાઇડ્રન્ટ્સ નકામા હોવાનું જણાયું છે અને ઘણા તો રસ્તાના સમારકામમાં જમીનમાં દબાઈ ગયા છે. આ વિશે વધુ જાણકારી આપતાં મુલુંડ-વેસ્ટના ફાયર-સ્ટેશનના એક ઑફિસરે પોતાનું નામ ન જણાવવાની શરતે મિડ-ડે LOCALને કહ્યું હતું કે ‘મુલુંડ-વેસ્ટમાં ટોટલ ૩૬૨ ફાયર-હાઇડ્રન્ટ્સ છે. એમાંથી ૪૬ કામ કરે છે અને બાકીના ૩૧૬ ડૅમેજ્ડ છે. દર ત્રણ મહિને આ હાઇડ્રન્ટ્સ ચેક કરવામાં આવે છે અને ફાઇનલ રિપોર્ટ T વૉર્ડમાં, વૉટર-ડિપાર્ટમેન્ટમાં અને ભાયખલાના ડિપાર્ટમેન્ટમાં મોકલવામાં આવે છે. મુલુંડ ઈસ્ટના વિસ્તારમાં ૧૮૫ ફાયર-હાઇડ્રન્ટ્સ છે જેમાંથી ૧૬ કામ કરે છે અને ૧૬૯ ડૅમેજ્ડ છે. ડૅમેજ થવાનું કારણ એ છે કે અમુક ચોરી થઈ જાય છે, થોડાઘણા રોડ નીચે દબાઈ જાય છે અને ઘણા તો પબ્લિક ચોરી નાખે છે.’

મુલુંડના ફાયર-હાઇડ્રન્ટ્સની ખરાબ હાલત વિશે એમએલએ સરદાર તારા સિંહને પૂછતાં તેમણે મિડ-ડે LOCALને કહ્યું હતું કે ‘મુલુંડમાં ફક્ત ૨૦થી ૩૦ ટકા જેટલા જ ફાયર-હાઇડ્રન્ટ્સ કામ કરે છે એ ખૂબ જ ખરાબ વાત કહેવાય. આગ જેવી અચાનક બનતી ઘટનાઓ માટેનાં સાવચેતીનાં સાધનો પર સુધરાઈએ પહેલાં ધ્યાન આપવું જોઈએ. પોલીસ અને સુધરાઈએ ફાયર-હાઇડ્રન્ટ્સની તપાસ કરવી જોઈએ. નાજુક સમયમાં કામ આવતી વસ્તુઓ પર સુધરાઈ ધ્યાન આપે એવું મારું સુધરાઈને નિવેદન છે.’

એમએલએ = મેમ્બર ઑફ લેજિસ્લેટિવ ઍસેમ્બ્લી

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK