કોવિડ-19 ટેસ્ટિંગ માટે રાજ્યમાં ટૂંક સમયમાં મોબાઇલ વૅન ઉપલબ્ધ કરાશે
મુખ્ય પ્રધાન ઉદ્ધવ ઠાકરે
મહારાષ્ટ્રના મુખ્ય પ્રધાન ઉદ્ધવ ઠાકરેએ કહ્યું હતું કે ટૂંક સમયમાં રાજ્યમાં કોવિડ-19ના ટેસ્ટિંગ માટે મોબાઇલ લૅબોરેટરી ઉપલબ્ધ કરાશે. માત્ર ૪૯૯ રૂપિયામાં આ મોબાઇલ લૅબોરેટરી એક દિવસમાં ૩૦૦૦ ટેસ્ટ કરી શકે છે તેમ જ ૨૪ કલાકમાં એનો રિપોર્ટ મળી જશે. કોવિડ-19 ટેસ્ટિંગ માટે ત્રણ મોબાઇલ લૅબોરેટરી લૉન્ચ કરવાના પ્રસંગે તેમણે ઉપરોક્ત નિવેદન કર્યું હતું. આ પ્રસંગે બીએમસીના કમિશનર આઇ. એસ. ચહલ પણ ઉપસ્થિત રહ્યા હતા.
નૅશનલ એક્રિડેશન બોર્ડ ફૉર ટેસ્ટિંગ ઍન્ડ કૅલિબ્રેશન લૅબોરેટરીઝ દ્વારા માન્યતાપ્રાપ્ત સ્પાઇસ હેલ્થ અને આઇસીએમઆર દ્વારા ઉપલબ્ધ કરવામાં આવેલી આ મોબાઇલ લૅબોરેટરીઝ બાંદરા-કુર્લા કૉમ્પ્લેક્સ, વરલી ખાતે નૅશનલ સ્પોર્ટ્સ ક્લબ ઑફ ઇન્ડિયા અને ગોરેગામમાં નેસ્કો ખાતે સ્થાપિત કરવામાં આવશે. ગયા વર્ષ સુધી મુંબઈ અને પુણે એમ બે જ લૅબોરેટરીમાં કોવિડ-19 ટેસ્ટિંગ કરવામાં આવતું હતું. જોકે હવે રાજ્યમાં ૫૦૦ કરતાં વધુ લૅબોરેટરી છે એમ મુખ્ય પ્રધાન ઉદ્ધવ ઠાકરેએ જણાવ્યું હતું.
