મુંબઈ : રસ્તાના ખાડાએ યુવા આર્ટ ડિરેક્ટરનો ભોગ લીધો
ભિવંડી વસઈના રસ્તામાં પડેલા આવા ખાડાઓને લીધે આર્ટ ડિરેક્ટર હર્ષ સિંહનું મૃત્યુ થયું.
ભિવંડી-વસઈ રોડ પર કાલવાર ગામ પરિસરમાં રસ્તા પરથી પસાર થઈ રહેલી બાઇકનું ખાડાને કારણે બૅલૅન્સ જવાથી એ ડિવાઇડર સાથે અથડાવાના અકસ્માતમાં ૨૬ વર્ષના એક આર્ટ ડિરેક્ટરે જીવ ગુમાવ્યો હતો. શાસન ટોલ વસૂલી કરે છે, પરંતુ રસ્તાના ખાડા ન ભરાતા હોવાથી આવા અકસ્માતમાં અનેક લોકોના જીવ જાય છે.
ADVERTISEMENT
૨૬ વર્ષના આર્ટ ડિરેક્ટર હર્ષ વિનોદ સિંહ નાયગાંવમાં શૂટિંગનું લૉકેશન જોવા માટે ભિવંડી-વસઈ માર્ગ દ્વારા તે પોતાની રૉયલ ઇનફિલ્ડ લઈને જઈ રહ્યો હતો ત્યારે આ અકસ્માત તેને નડ્યો હતો. જોકે અકસ્માતમાં હર્ષના માથામાં ગંભીર ઈજા થવાથી તેણે જીવ ગુમાવ્યો હતો.
આ બનાવની નોંધ ભોઇવાડા પોલીસે લીધી છે. ઉલ્લેખનીય છે કે ભિવંડી તાલુકામાં મારકોલીથી ચિંચોટી રસ્તા પર મોટા પ્રમાણમાં ખાડાઓ થઈ ગયા છે, જેને કારણે લોકોને અવર-જવર કરવામાં મુશ્કેલી થાય છે. ખાડાઓને લીધે પહેલા પણ કેટલાક જીવલેણ અકસ્માત થયા હોવાનું મનાય છે. આ ચોમાસાના પહેલાં વરસાદમાં અહીંના ગ્રામીણજનોએ ખાડાના વિરોધમાં રસ્તા પર ઊતરીને આંદોલન સુધ્ધાં કરીને આ માર્ગનો ટોલ નાકા બંધ પણ કર્યો હતો. એ વખતે પ્રશાસને ખાડા પુરવાનું આશ્વાસન આપીને આંદોલન પાછું લેવાનું કહ્યું હતું, પરંતુ હજી સુધી ખાડા ભરાયા નથી અને યુવા આર્ટ ડિરેક્ટર હર્ષ સિંહ એનો ભોગ બન્યો છે.