Gujarati Mid-day

ઇ-પેપર

વેબસ્ટોરીઝ

વેબસ્ટોરીઝ


હોમ > કૉલમ > લાઇફ કા ફન્ડા: મિલ્યન ડૉલર પેઇન્ટિંગ

લાઇફ કા ફન્ડા: મિલ્યન ડૉલર પેઇન્ટિંગ

29 June, 2020 01:44 PM IST | Mumbai
Heta Bhushan | feedbackgmd@mid-day.com

લાઇફ કા ફન્ડા: મિલ્યન ડૉલર પેઇન્ટિંગ

લાઇફ કા ફન્ડા: મિલ્યન ડૉલર પેઇન્ટિંગ


એક દિવસ એક હોટેલમાં પિકાસોને એક મોટા ઘરની શ્રીમંત મહિલા મળી. તેણે તેમની પાસે જઈને કહ્યું, ‘હું આપની કલાની ચાહક છું. મને તમે એક પેઇન્ટિંગ દોરી આપો.’
પિકાસોએ કહ્યું, ‘અહીં, અત્યારે એ શક્ય નથી, તમે મને શાંતિથી મળજો. હું તમને ચોક્કસ પેઇન્ટિંગ દોરી આપીશ.’
મહિલાએ કહ્યું, ‘આજે આપણે મળ્યા એની યાદરૂપે તમે મને કઈક તો દોરીને આપો જ.’
પિકાસોએ ફરી કહ્યું, ‘પણ મૅડમ, મારી પાસે કોઈ પેઇન્ટિંગનાં સાધનો નથી.’
મહિલાએ જિદ કરતાં કહ્યું, ‘વાંધો નહીં, તમે મને પેન કે પેન્સિલની મદદથી આ કાગળ પર કઈ પણ યાદગીરી માટે દોરી આપો, પછી આપણે મળીએ કે ન મળીએ.’
અંતે મહિલાની લાગણી અને જિદ સામે ઝૂકી જઈને પિકાસોએ મહિલાના હાથમાંથી કાગળ લઈ હોટેલની રિસેપ્શનિસ્ટ પાસેથી એક પેન માગી અને ઊભા-ઊભા ૩૦ સેકન્ડમાં એક પેઇન્ટિંગ દોરી આપ્યું અને બોલ્યા, ‘મૅડમ, તમારી મારા પ્રત્યેની અને કળા પ્રત્યેની લાગણીને કારણે આ મારા તરફથી આપને એક નાનકડી અમૂલ્ય ભેટ.’
મહિલા ખૂબ-ખૂબ આભાર માની ત્યાંથી નીકળી ગઈ. તે વિચાર કરી રહી હતી કે કલાકારો સાચ્ચે ધૂની હોય. મારી વિનંતીને માન આપી તેમણે મારા જ આપેલા કાગળ પર માત્ર પેનથી ઊભા-ઊભા એક ચિત્ર દોરી આપ્યું, એને અમૂલ્ય ભેટ કહે છે. મહિલાએ ઘરે આવી પોતાના અમીર ઉમરાવ પતિને પિકાસો સાથેની મુલાકાત વિશે વાત કરી અને તેમણે દોરીને આપેલું પેઇન્ટિંગ બતાવ્યું.
પત્નીની વાત સાંભળી પતિ ઊભો થઈ ગયો અને વારંવાર પૂછવા લાગ્યો, ‘શું આ સાચ્ચે પિકાસોએ ઊભા-ઊભા દોરીને આપ્યું છે.’
પત્નીએ કહ્યું, ‘હા, પણ એમાં શું કામ વારંવાર પૂછો છો?’
પતિએ કહ્યું, ‘તને ખબર છે, પિકાસોના હાથથી દોરાયેલા આ નાનકડા ચિત્રની કિંમત મિલ્યન ડૉલરથી વધુ ગણાય.’
પત્ની બોલી, ‘હવે મને સમજાયું કે ચિત્ર
આપતી વખતે તેઓ બોલ્યા હતા, મારા તરફથી અમૂલ્ય ભેટ...’
બીજે દિવસે તે મહિલા પિકાસોને મળવા પહોંચી ગઈ અને આભાર માનતાં કહેવા લાગી, ‘આપના દ્વારા ઊભા-ઊભા ૩૦ સેકન્ડમાં દોરાયેલા નાના ચિત્રની કિંમત મારા પતિ કહે છે કે મિલ્યન ડૉલરથી પણ વધુ કહેવાય. તો મારે તમને હજી એક વિનંતી કરવી છે કે મને તમે ચિત્ર દોરતા શીખવાડો. ભલે હું ૩૦ સેકન્ડમાં નહીં, પણ ૩૦થી ૪૦ મિનિટમાં આવું ચિત્ર દોરી શકીશ. તો મારું ચિત્ર પણ મિલ્યન ડૉલરમાં વેચાશે.’
પિકાસો બોલ્યા, ‘મૅડમ, ૩૦ સેકન્ડમાં હું  ઊભા-ઊભા ચિત્ર દોરું અને તો પણ એની મિલ્યન ડૉલરમાં કિંમત એટલે થાય છે કે ચિત્રકલા શીખવામાં મેં મારા જીવનનાં ૩૦ વર્ષ આપ્યાં છે. દિવસ-રાત જોયા વિના કલાની સાધના કરી છે અને આજે પણ શીખી જ રહ્યો છું. બસ, તમે પણ આટલી મહેનત કરો. જીવનનાં ૩૦ વર્ષ આપો એટલે તમારું ચિત્ર પણ મિલ્યન ડૉલરમાં વેચાશે.’


Whatsapp-channel Whatsapp-channel

29 June, 2020 01:44 PM IST | Mumbai | Heta Bhushan

App Banner App Banner

અન્ય લેખો


X
ક્વિઝમાં ભાગ લો અને જીતો ગિફ્ટ વાઉચર
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK