ઘાટકોપરમાં કચ્છી વેપારીની હત્યા

Published: 8th November, 2011 20:09 IST

મૂળ ભચાઉ તાલુકાના વોંધ ગામના ૪૫ વર્ષના કચ્છી વાગડ લોહાણા સમાજના દિનેશ ઠક્કર શનિવારે બપોરે બાર વાગ્યે ઘરથી ઘાટકોપરના અસલ્ફામાં આવેલા એમ્બ્રૉઇડરીના કારખાને જવા નીકળ્યા અને રાત્રે અગિયાર વાગ્યા સુધી પાછા ન આવતાં તેમની પત્નીએ દિનેશભાઈને ફોન લગાડ્યો, જે સ્વિચ્ડ-ઑફ આવતાં ચિંતાતુર થઈને તેમણે દિનેશભાઈના નાના ભાઈ કમલેશ ઠક્કરને જાણ કરી હતી.

 

દિનેશ ઠક્કરના મૃત્યુની જાણ કમલેશ ઠક્કરને કઈ રીતે થઈ એ વિશે ‘મિડ-ડે’ને જણાવતાં તેમણે કહ્યું હતું કે ‘શનિવારે રાત્રે મારી ભાભીનો ફોન આવતાં હું કારખાને ગયો. ત્યાં તાળું જોઈને મને થયું કે ભાઈ ઘરે ગયા હશે અને કારીગરો બીજા દિવસે રવિવાર હોવાથી ફરવા નીકળી ગયા હશે, પણ બીજા દિવસેય દિનેશભાઈ ઘરે ન આવતાં હું કારખાને ગયો તો જોયું કે તાળું હતું. મને થયું કે કદાચ રવિવારની રજાને લીધે કારખાનામાં કામ કરતા મજૂરો ભાઈના ઘરે ન આવવાની વાતથી અજાણ હશે અને ફરવા ગયા હશે, પણ જ્યારે હું સોમવારે કારખાને ગયો અને તાળું જોયું એટલે મને શંકા ગઈ અને પોલીસને બોલાવી કારખાનાનું તાળું તોડાવ્યું તો અંદર દિનેશભાઈના ગળા પર વાયર વીંટાળેલા હતા અને તેમનું લોહીલુહાણ શરીર ત્યાં પડ્યું હતું.’

દિનેશ ઠક્કરને નવ વર્ષનો પુત્ર અને સાત વર્ષની પુત્રી એમ બે સંતાનો છે. પોલીસે તપાસ કરતાં જણાયું હતું કે કારખાનામાં કામ કરનારી વ્યક્તિઓનો સામાન ત્યાં નહોતો કે ન તો બે મજૂરોનો કોઈ પત્તો હતો એટલે પોલીસને એ બન્ને મજૂરો પર જ શંકા છે. પોલીસે તપાસ શરૂ કરી છે.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK