કચ્છ રણ મહોત્સવ : ટેન્ટ-સિટી સામે ભૂંગા-સિટી

Published: Dec 07, 2011, 09:34 IST

કચ્છ રણ મહોત્સવને છેલ્લાં બે વર્ષથી મળતા રહેલા રિસ્પૉન્સને જોતાં લેવામાં આવેલું પગલું

(રશ્મિન શાહ)

રાજકોટ, તા. ૭

છેલ્લાં બે વર્ષથી જે રીતે કચ્છ રણ મહોત્સવના ટેન્ટ-સિટીને રિસ્પૉન્સ મળી રહ્યો છે એ જોઈને આ વર્ષે ધોરડો ગ્રામપંચાયતે પંચાયતની હદમાં ભૂંગા બનાવ્યા છે અને એ પ્રવાસીઓને ભાડે આપવામાં આવશે. ટેન્ટ-સિટી હંગામી છે અને કચ્છ રણ મહોત્સવ સુધી જ રહેવાનું હોય છે, પણ ધોરડોમાં બનાવવામાં આવેલા ભૂંગા કાયમી છે અને કાયમ માટે રહેશે. ટેન્ટ-સિટીથી અંદાજે અડધો કિલોમીટર દૂર આવેલા આ ભૂંગા સામે ગુજરાત સરકાર કે ગુજરાત સરકારના ટૂરિઝમ ડિપાર્ટમેન્ટે કોઈ વિરોધ નથી કર્યો. ગુજરાત ટૂરિઝમ કૉર્પોરેશન લિમિટેડના ચૅરમૅન કમલેશ પટેલે કહ્યું હતું કે ‘અલ્ટિમેટલી કચ્છના ટૂરિઝમના ડેવલપમેન્ટ માટે જ રણ મહોત્સવ કરવામાં આવે છે ત્યારે આ પ્રકારની કોઈ ઍક્ટિવિટીનો વિરોધ કરવો યોગ્ય નથી. ધોરડોમાં જે ભૂંગા બનાવવામાં આવ્યા છે એ પર્મનન્ટ છે એટલે રણ મહોત્સવ પછી પણ ધોરડોનું સફેદ રણ જોવા આવનારાઓને એ કામ લાગશે.’

ધોરડો ગ્રામપંચાયત દ્વારા કુલ ૧૫ ભૂંગા બનાવવામાં આવ્યા છે, જેમાંથી ૭ એસી અને ૮ નૉન-એસી છે. એસી ભૂંગા માટે ૩૮૦૦ રૂપિયા અને નૉન-એસી ભૂંગા માટે ૩૨૦૦ રૂપિયા ભાડું નક્કી કરવામાં આવ્યું છે. આ ભાડું નક્કી કરવાનું કામ ધોરડો ગ્રામપંચાયત કરે છે. આ ભૂંગામાં રહેવા આવનારા ટૂરિસ્ટોને સવારના નાસ્તાથી માંડીને રાતના જમણ સુધીની સુવિધા ફ્રી આપવામાં આવશે. મજાની વાત એ છે કે પચ્છમ ગ્રામીણ સંસ્કૃતિના આધારે બનાવવામાં આવેલા આ ભૂંગામાં રહેનારાઓને ફૂડ પણ ટિપિકલ કચ્છ સ્ટાઇલનું આપવામાં આવશે. આ ઉપરાંત ધોરડોના સફેદ રણ સુધીની કૅમલ-સફારી પણ ગ્રામપંચાયત દ્વારા પૂરી પાડવામાં આવશે. કાયમી ભૂંગા બનાવવાનો આ વિચાર ધોરડો ગ્રામપંચાયતના સરપંચ મિયાં હુસેન ગુલબગનો હતો.

Loading...
 
 
Loading...
Loading...
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK