મુંબઈ નજીક એકસાથે દેખાઈ સેંકડો ડૉલ્ફિન્સ
મુંબઇના પશ્ચિમ કાંઠે માછીમારોને એક અતિદુર્લભ કહી શકાય તેવી ઘટનામાં હમ્પબેક ડોલ્ફિનનો સમૂહ જોવાનો અનેરો લહાવો મળ્યો હતો. તે તરફ સફર ખેડી રહેલા માછીમારોએ દાવો કર્યો હતો કે, છેલ્લાં કેટલાંક વર્ષોથી ડોલ્ફિન દેખાઇ જતી હતી, પરંતુ તાજેતરમાં સેંકડો ડોલ્ફિન એક સાથે જોવા મળી તેવું દ્રશ્ય ભાગ્યે જ જોવા મળે છે અને આ તથ્ય પરથી એવું પણ સમજી શકાય છે કે, તેમના વસવાટનું રક્ષણ કરવું અત્યંત મહત્ત્વપૂર્ણ છે.
મિડ-ડે સાથે વાત કરતાં ગણેશ નાખાવાએ જણાવ્યું હતું કે, “થોડા દિવસો પહેલા ગુજરાતના માંગરોળના માછીમારોનું જૂથ ટ્રોલર ફિશિંગબોટમાંથી મુંબઇના કાંઠેથી આશરે ૨૦૦ નૉટિકલ માઇલ કિ.મી. દૂર ટ્યુના માછલી માટે માછીમારી કરી રહ્યા હતા, ત્યાં અચાનક જ ડોલ્ફિન તેમની હોડીની પાછળ આવી હતી. તે સેંકડો ડોલ્ફિન્સનું ટોળું હતું અને પશ્ચિમ કાંઠે દરિયાઇ સૃષ્ટિ જોવી એ એક સારો સંકેત છે.”
નાખવાને પણ ૨૨મી ડિસેમ્બરે તે જ સ્થળે માછીમારી કરવા દરમિયાન ડોલ્ફિનનો આવો મોટો સમૂહ જોવાનું સદ્ભાગ્ય સાંપડ્યું હતું.
