સુરત: કોરોના વાઇરસ સુરતના હીરા ઉદ્યોગને બીમાર પાડશે

Published: Feb 03, 2020, 07:46 IST | Rashmin Shah | Surat

કોરોના વાઇરસથી અડધું જગત ધ્રૂજવા માંડ્યું છે, પણ આ વાઇરસને કારણે અત્યારે સૌથી મોટો ફફડાટ સુરતના હીરાઉદ્યોગમાં પ્રસરી ગયો છે.

કોરોના વાઇરસ
કોરોના વાઇરસ

કોરોના વાઇરસથી અડધું જગત ધ્રૂજવા માંડ્યું છે, પણ આ વાઇરસને કારણે અત્યારે સૌથી મોટો ફફડાટ સુરતના હીરાઉદ્યોગમાં પ્રસરી ગયો છે. સુરતના પૉલિશ્ડ ડાયમન્ડની કુલ ખપતમાંથી ૩૭ ટકા ડિમાન્ડ હૉન્ગકૉન્ગની હોય છે, જ્યારે ૪ ટકા માગ ચાઇનાની રહે છે, જે હૉન્ગકૉન્ગથી જ ઑપરેટ થાય છે. કોરોના વાઇરસને કારણે આ બન્ને માગ પર સીધી અસર થઈ હોવાનું કહેતાં સુરત ડાયમન્ડ અસોસિએશનના ભૂતપૂર્વ પ્રમુખ અને જેમ્સ ઍન્ડ જ્વેલરી કાઉન્સિલના ગુજરાત રીજનના ચૅરમૅન દિનેશ નાવડિયાએ કહ્યું હતું કે ‘કોરોના વાઇરસને લીધે આ બિઝનેસ પર સીધી અસર થશે. જો કોરોના વાઇરસની આ જે ત્રાસદી છે એ વહેલી પૂરી નહીં થાય તો સુરતના હીરા ઉદ્યોગને બહુ મોટી નુકસાની ભોગવવાનો વારો આવશે.’

સુરતનો હીરા ઉદ્યોગ હૉન્ગકૉન્ગ અને ચીનમાં વર્ષેદહાડે ૪૦,૦૦૦થી ૪પ,૦૦૦ કરોડનો વેપાર કરે છે. આ વેપાર હાલપૂરતો તો બિલકુલ ઠપ થઈ ગયો છે. હૉન્ગકૉન્ગ ગવર્નમેન્ટે કોરોના વાઇરસને કારણે શનિવારે ૩ માર્ચ સુધી સ્કૂલમાં વેકેશન જાહેર કરી દેતાં હૉન્ગકૉન્ગમાં રહેલી ૪૦૦થી ૫૦૦ ડાયમન્ડની ઑફિસમાં રજા પડી ગઈ છે. જો ત્રાસદી વધુ ફેલાય તો હૉન્ગકૉન્ગથી નીકળવામાં તકલીફ પડે અને એવું ન થાય એ માટે મોટા ભાગની ડાયમન્ડ ઑફિસના માલિકો પોતાના સ્ટાફને પાછો બોલાવી લેવાની ગણતરી રાખે છે.

બીજી મોટી મૂંઝવણ જો કોઈ હોય તો એ હૉન્ગકૉન્ગમાં યોજાનારા ૪ માર્ચથી વર્લ્ડ ડાયમન્ડ ટ્રેડ-શોની છે. આ ટ્રેડ-શો ૮ માર્ચ સુધી ચાલવાનો છે. કોરોના વાઇરસને કારણે જે પરિસ્થિતિ છે એ પરિસ્થિતિમાં હૉન્ગકૉન્ગ કે પછી કોરોનાગ્રસ્ત વિસ્તારોમાં આવવા યુરોપ અને અમેરિકા, ઑસ્ટ્રેલિયા જેવા કોરોનાથી અફેક્ટ ન થયા હોય એવા દેશો રાજી નહીં થાય. આ ટ્રેડ-શોમાં નવા બિઝનેસનું પ્લાનિંગ થતું હોય છે.

દિનેશ નાવડિયા કહે છે, ‘સુરતના હીરાના વેપારીઓ હૉન્ગકૉન્ગની ઑફિસ બંધ કરે એવી પૂરી શક્યતા છે અને સાથોસાથ કોરોનાને લીધે ટ્રેડ-શો પણ પાછળ લઈ જવામાં આવે એવું બની શકે. જો એવું થયું તો એની પણ સીધી અસર સુરતના હીરા ઉદ્યોગને થશે.’

આ પણ વાંચો : કચ્છની કોયલ ગીતા રબારીના ડાયરામાં થયો ડૉલરિયો વરસાદ

સુરતનો હીરા ઉદ્યોગ દર વર્ષે હૉન્ગકૉન્ગમાં થતા આ ટ્રેડ-શોમાં અંદાજે ૧૦,૦૦૦ કરોડ રૂપિયાના ઑર્ડર મેળવતું હોય છે. જો ટ્રેડ-શો પોસ્ટપૉન થયો તો બિઝનેસ પાછો ઠેલાશે અને જો રદ થયો તો હૉન્ગકૉન્ગ-ચાઇનાના નિયમિત બિઝનેસ સાથે સુરત ડાયમન્ડ ઇન્ડસ્ટ્રીએ આ ઑર્ડર પણ ગુમાવવાનો વારો આવશે.

Loading...
 
 
Loading...
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK