ગુજરાતમાં શિયાળાની શરૂઆતમાં ઉનાળાનો માહોલ - તાપમાન ૪૦.૧ ડિગ્રી

Published: 19th October, 2011 18:38 IST

ઑફિશ્યલ શિયાળાની શરૂઆત થયાને ૧૨ દિવસ થઈ ગયા છે. સામાન્ય રીતે આટલા દિવસમાં ગુજરાતમાં ગુલાબી ઠંડીની શરૂઆત થઈ જવી જોઈએ, પણ ઠંડી પડવાને બદલે છેલ્લા એક અઠવાડિયાથી ગુજરાતમાં ઉનાળામાં પડે એવી ગરમીની શરૂઆત થઈ છે અને મોટા ભાગનાં શહેરોનું મૅક્સિમમ ટેમ્પરેચર ગઈ કાલે ૩૯ ડિગ્રીથી વધારે રહ્યું હતું.

 

ગુલાબી ઠંડી પડવી જોઈએ એને બદલે કાળઝાળ ગરમી શરૂ થતાં છેલ્લા સાડાપાંચ મહિનાનું મૅક્સિમમ ટેમ્પરેચર નોંધાયું

ગુજરાત હવામાન વિભાગનાં ડિરેક્ટર કમલજિત રેએ કહ્યું હતું કે ‘ગ્લોબલ-વૉર્મિંગને કારણે અત્યારે ભળતી જ સીઝનનો અનુભવ થઈ રહ્યો છે. વેસ્ટર્ન ડિસ્ટર્બન્સની આ અસર ઓસરતાં ૪૮થી ૭૨ કલાક લાગશે અને એ પછી શિયાળાની ઠંડીની શરૂઆત થશે.’

ગુજરાતનું સૌથી ગરમ શહેર ઈડર રહ્યું હતું. ગઈ કાલે ઈડરનું તાપમાન ૪૦.૧ ડિગ્રી હતું; જ્યારે અમરેલીમાં ૪૦, સુરેન્દ્રનગરમાં ૩૯.૭, વડોદરામાં ૩૯.૫, ડીસામાં ૩૯, ભાવનગરમાં ૩૮.૭, નલિયામાં ૩૮.૨, રાજકોટમાં ૩૮, કંડલામાં ૩૭.૯, માંડવીમાં ૩૭.૫, અમદાવાદમાં ૩૭.૪, ગાંધીનગરમાં ૩૭.૨, ભુજમાં ૩૬.૯ અને સુરતમાં ૩૫.૮ ડિગ્રી મહત્તમ તાપમાન રહ્યું હતું. આ અગાઉ સાડાપાંચ મહિના પહેલાં આ શહેરોમાં આટલું મૅક્સિમમ ટેમ્પરેચર નોંધાયું હતું.

ગુજરાતનું ઍવરેજ મૅક્સિમમ ટેમ્પરેચર ગઈ કાલે ૩૯.૯ ડિગ્રી રહ્યું હતું. ગુજરાતમાં હાલ એકસાથે બે ઋતુનો અનુભવ થઈ રહ્યો હોવાથી માંદગીના બનાવોમાં પણ ખાસ્સો વધારો થયો છે. જોકે, મોસમનો આવો મિજાજ થોડાં સમય સુધી જ રહે અને ત્યારબાદ રાબેતા મુજબ ઠંડી પડવાની શરૂઆત થઈ જાય એવી આશા રાખવામાં આવી રહી છે.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK