ફાઇઝરની રસીને ઇમર્જન્સી યુઝ માટે વિશ્વ આરોગ્ય સંસ્થાએ આપી મંજૂરી

ફાઇઝર- બાયો એનટેકની કોરોના વાઇરસ પ્રતિરોધક રસીને ગઈ કાલે વર્લ્ડ હેલ્થ ઓર્ગેનાઇઝેશને મંજૂરી આપી હતી. આ રસી યુરોપ અને નોર્થ અમેરિકામાં ઉપલબ્ધ હોવાથી હવે વર્લ્ડ હેલ્થ ઓર્ગેનાઇઝેશનની મંજૂરીને પગલે ગરીબ દેશોમાં પણ એ રસી પહોંચશે.

કોરોનાની રસી જે દેશમાં પહોંચે એ દેશની ડ્રગ રેગ્યુલેટરી ઑથોરિટી તેને મંજૂરી આપે છે. પરંતુ પાંખું કે કંગાળ વહીવટીતંત્ર ધરાવતા ગરીબ દેશોમાં ફક્ત વર્લ્ડ હેલ્થ ઓર્ગેનાઇઝેશનની મંજૂરી પર આધાર રાખવામાં આવે છે. ફાઇઝર-બાયો એનટેકની વૅક્સિનને અલ્ટ્રા ફ્રોઝન ટેમ્પરેચર્સમાં રાખવી પડે છે, પરંતુ ગરીબ દેશોમાં એવા અદ્યતન ફ્રિઝર્સ ઉપલબ્ધ થવાની મુશ્કેલી અને વીજપુરવઠાની અનિયમિતતાને કારણે એ વૅક્સિન્સ જાળવવાની મુશ્કેલી જેવા પ્રશ્નો ઉપસ્થિત થાય છે. તેથી વર્લ્ડ હેલ્થ ઓર્ગેનાઇઝેશન જેવા યુનાઇટેડ નૅશન્સ અને અન્ય વૈશ્વિક સંગઠનોના આયોજનો વિકસતા દેશોને મદદરૂપ થતા હોય છે.