અમેરિકામાં સેંકડો ફાસ્ટ-ફૂડ આઉટલેટ્સની બહાર હજારો ગે કપલે એકમેકને કરી કિસ

Published: 6th August, 2012 05:21 IST

અમેરિકામાં ૧૬૦૦થી વધુ આઉટલેટ્સ ધરાવતી એક ફાસ્ટ-ફૂડ ચેઇને અણધારી આફતનો સામનો કરવો પડ્યો હતો.

વાત એમ હતી કે ચિક-ફિલ-એ નામની આ ચેઇન રેસ્ટોરાંના માલિક ડેન કેથીએ રેડિયો પર આપેલા એક ઇન્ટરવ્યુમાં એવું કહી દીધું હતું કે સજાતીય લગ્નોને મંજૂરી આપીને અમેરિકા ઈશ્વરના કોપને આમંત્રણ આપી રહ્યું છે. તેમના આ સ્ટેટમેન્ટથી અમેરિકાનો ગે સમુદાય ભડકી ઊઠ્યો હતો. એ પછી ગે લોકોના એક ગ્રુપે ડેન કેથીની કમેન્ટનો વિરોધ કરવા તેમની માલિકીની તમામ રેસ્ટોરાંની બહાર ભેગા મળીને એકમેકને કિસ કરવાની હાકલ કરી હતી. એ પછી શુક્રવારે અમેરિકાનાં અનેક શહેરોમાં આવેલી ચિક-ફિલ-એના આઉટલેટ્સની બહાર સજાતીય સંબંધ ધરાવતા અંદાજે ૧૪,૦૦૦ લોકોએ એકમેકના પાર્ટનરને ચસચસતું ચુંબન કર્યું હતું. કિસ-ઇન નામના આ કૅમ્પેન દ્વારા અમેરિકાના ગે સમુદાયે લોકોને મેસેજ આપ્યો હતો કે તેમને છંછેડવામાં મઝા નથી. અમેરિકાનાં છ રાજ્યોએ સજાતીય લગ્નોને મંજૂરી આપી દીધી છે. હાલમાં ચાલી રહેલી પ્રમુખપદની ચૂંટણીના કૅમ્પેનમાં પણ આ મુદ્દો ચગ્યો છે. અમેરિકાના પ્રમુખ બરાક ઓબામા સજાતીય લગ્નોને સમર્થન આપી રહ્યા છે, જ્યારે તેમના હરીફ રિપબ્લિકન પાર્ટીના ઉમેદવાર મીટ રોમની તેમના વિરોધી છે.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK