બે વ્યક્તિની ધરપકડ સાથે વાશીમાં ઘરચોરીના ચાર કેસ ઉકેલાયા
વાશી પોલીસ આરોપી પાસેથી જપ્ત કરાયેલા મુદ્દામાલ સાથે
વાશી પોલીસે ચાર ઘરચોરીના કેસ ઉકેલ્યા છે. છેલ્લા કેટલાક દિવસોથી વાશીના નવી મુંબઈ વિસ્તારમાં ચોરીની ઘટના વધી હતી એ જોતાં પોલીસે ચોરી થયેલી જગ્યાઓના ૧૦૦ કરતાં વધુ સીસીટીવી કૅમેરા તપાસીને બે આરોપીની ધરપકડ કરી છે. તેઓ પાસેથી આશરે ચાર લાખ રૂપિયાની મતા મળી આવી છે.
પોલીસે જણાવ્યા અનુસાર વાશીમાં ૧૫ દિવસ પહેલાં ચોરીની ઘટના બની હતી જેમાં ચોર ઘરમાં પડેલા દોઢ લાખના દાગીના અને રોકડ લઈ નાસી ગયા હતા. ત્યાર બાદ પોલીસે ફરિયાદ નોંધી તપાસ હાથ ધરી હતી. છેલ્લા એક મહિનામાં ચોરીની ઘટના વધતાં પોલીસે અનેક વિભાગ બનાવી ચોરી થયેલા વિસ્તારની તપાસ કરી હતી, જેમાં બે શંકાસ્પદ માણસ દેખાયા હતા. તેઓની તપાસ કરી સંજય કાંબળે અને સદ્દામ ખાનની ધરપકડ કરી હતી.
ADVERTISEMENT
વાશી પોલીસ સ્ટેશના એક અધિકારીએ કહ્યું હતું કે આરોપી વિરુદ્ધ મુંબઈ સહિત થાણે અને નવી મુંબઈના આશરે ૪૫થી ૫૦ કેસ દાખલ છે. તેઓ પાસેથી આશરે ૩,૭૭,૦૦૦ રૂપિયાની મતા જપ્ત કરવામાં આવી છે. કોર્ટમાં હાજર કરતાં તેઓને ૧૦ ડિસેમ્બર સુધીની પોલીસ-કસ્ટડી આપવામાં આવી છે.