હૅન્ગિંગ ગાર્ડન પાસે આવેલી ઇમારતમાં આગ
તળ મુંબઈના પૉશ વિસ્તાર મલબાર હિલના જાણીતા હૅન્ગિંગ ગાર્ડન પાસે આવેલા ૧૦ માળના બિલ્ડિંગના પાંચમા માળે બુધવારે રાતે ૮ વાગ્યાની આસપાસ આગ ફાટી નીકળી હતી. ઘટનાની જાણ ફાયરબ્રિગેડને કરવામાં આવતાં ૮ ફાયરએન્જિન, ૭ જમ્બો ટૅન્કર, ૧૦૮ ઍમ્બ્યુલન્સ, ૨ ક્વીક રિસ્પોન્સ વેહિકલ અને અન્ય વાહનો ઘટનાસ્થળે ધસી ગયાં હતાં અને બચાવકાર્ય હાથ ધરવામાં આવ્યું હતું. આ વિશે વધુ માહિતી આપતાં પાલિકાના ડિઝાસ્ટર મૅનેજમેન્ટના પીઆરઓ વિજય ખબાળેએ કહ્યું હતું કે ફાયરબ્રિગેડના જવાનોએ ૧૩ જણને બચાવી લીધા હતા. જોકે આ ઑપરેશનમાં ફાયરબ્રિગેડના એક જવાનને શ્વાસ લેવામાં તકલીફ થતાં તેને નાયર હૉસ્પિટલ લઈ જવાયો હતો. મોડી રાત સુધી આગ પર કાબૂ મેળવવાના પ્રયાસ ચાલુ હતા.
