વરલીમાં રશિયન મૉડલને બે યુવકો હોઠ પર બચકું ભરીને નાસી ગયા

આ સંદર્ભે વરલી પોલીસ-સ્ટેશનમાં ગઈ કાલે વિનયભંગનો ગુનો નોંધાયો હતો. પોલીસ અત્યારે એ વિસ્તારમાં લગાવવામાં આવેલા સીસીટીવી કૅમેરાના ફુટેજની મદદ લઈને આરોપીઓની શોધ કરી રહી છે.

વરલી પોલીસ-સ્ટેશનના પોલીસ-ઑફિસરે નામ ન આપવાની શરતે ‘મિડ-ડે’ને કહ્યું હતું કે ‘૨૧ વર્ષની મૉડલ શનિવારે તેના બે મિત્રો સાથે રશિયાથી મુંબઈ આવી હતી અને વરલીમાં આવેલી હોટેલમાં રોકાઈ હતી. રવિવારે સવારે ચાર વાગ્યે તે તેના બે મિત્રો સાથે હોટેલમાંથી બહાર આવી એ વખતે બે યુવકોએ તેનો વિનયભંગ કર્યો હતો અને તેના હોઠ પર બચકું ભર્યું હતું. દરમ્યાન મૉડલના બે મિત્રોએ તેને છોડાવી હતી અને બચાવી લીધી હતી, પણ યુવકો ત્યાંથી નાસી ગયા હતા. મૉડલને હોઠ પરથી વધુ લોહી નીકળતાં નજીકમાં આવેલી બ્રીચ કૅન્ડી હૉસ્પિટલમાં સારવાર માટે લઈ જવામાં આવી હતી. હૉસ્પિટલમાં ડૉક્ટરને આ વિશે જાણ થતાં તેમણે પોલીસને જાણ કરી હતી. અત્યારે અમે આરોપીઓની શોધ કરીરહ્યા છીએ.’