હિન્દુ રાષ્ટ્રની વાત પર આટલા બૂમબરાડા શા માટે થાય છે?

Published: 27th December, 2014 07:05 IST

આપણે ત્યાં હિન્દુ શબ્દ પર શું કામ આટલોબધો વિવાદ થાય છે અને થતો રહે છે એ ક્યારેય સમજાતું નથી. સેક્યુલરિઝમના નામે આજે એવી પરિસ્થિતિ નિર્માણ થઈ ગઈ છે કે હિન્દુત્વની જ્યારે પણ અને જ્યાં પણ ચર્ચા થાય ત્યાં વિરોધનો માહોલ પહેલાં ઊભો થઈ જાય છે.



(સ્પેશ્યલ કમેન્ટ- મોહન ભાગવત સરસંઘચાલક, રાષ્ટ્રીય સ્વયંસેવક સંઘ)

જુઓ, જ્યાં જે કમ્યુનિટી વધારે પ્રમાણમાં હોય ત્યાં એ કમ્યુનિટીનું વર્ચસ્વ વધારે હોય એ સ્વાભાવિક રીતે સ્વીકારવું જોઈએ. આ એક દસ્તૂર માત્ર છે અને આ દસ્તૂર કોઈ પણ દેશમાં, કોઈ પણ શહેરમાં અને કોઈ પણ માહોલમાં લાગુ પડે. જૈન સોસાયટીમાં કાંદા-બટાકા લઈને લારીવાળો પણ આવતો નહીં હોય અને પંજાબીઓનું પ્રમાણ જ્યાં વધારે હોય ત્યાં બેચાર જૈનની લાગણી પર ધ્યાન ન આપવામાં આવે અને ઈંડાં કે એવી ચીજવસ્તુઓ આસાનથી વેચાતી હોય તો એ પણ સમજી શકાય. આ સામાન્ય વાત સ્વીકારવા આજે બધા તૈયાર છે, પણ વાત જ્યારે હિન્દુત્વની આવીને ઊભી રહે ત્યારે અનેક લોકોને તકલીફ પડવા માંડે છે. જુઓ, હું માનું જ છું કે આપણું રાષ્ટ્ર છે એ હિન્દુ રાષ્ટ્ર છે અને મારી આ માન્યતામાં કંઈ ખરાબી નથી. પણ હા, હિન્દુ રાષ્ટ્રમાં હોવાની વાતથી જો કોઈને શરમ આવતી હોય કે હિન્દુ રાષ્ટ્રના વિધા નથી કોઈને તકલીફ પડતી હોય તો એ વાત ચોક્કસ શરમજનક કહેવાય.

આ અગાઉ પણ કહ્યું છે કે હિન્દુત્વની વ્યાખ્યા ક્યાંય ધર્મ સાથે જોડાયેલી નથી. હિન્દુત્વની વાત રાષ્ટ્રીયતા સાથે જોડાયેલી છે અને એને એ જ રીતે સ્વીકારવી જોઈએ. હિન્દુસ્તાનમાં રહેતો દરેક નાગરિક પહેલાં હિન્દુ જ ગણાવો જોઈએ અને એ જ રીતે તેણે જીવવું જોઈએ. રાષ્ટ્રીયતાનો મુદ્દો અને ધર્મનો મુદ્દો એક કરવાની આવશ્યકતા નથી અને એ એક કરવો પણ ન જ જોઈએ. અંગતપણે કે રાષ્ટ્રીય સ્વયંસેવક સંઘ દ્વારા ક્યારેય એ વાત કહેવામાં નથી આવી કે ધર્મને જોવામાં આવે. ધર્મ એ અંગત માનસિકતા હોઈ શકે, પણ રાષ્ટ્રીય પ્રેમ અને રાષ્ટ્રીય ધર્મ હંમેશાં એક જ હોવા જોઈએ.

રાષ્ટ્રીયતાને ક્યારેય અવગણવી ન જોઈએ. રાષ્ટ્રવાદને આપણે વધુ પ્રબળ બનાવવાની જરૂર હોય એવું હંમેશાં લાગ્યું છે. રાષ્ટ્રવાદથી રાષ્ટ્ર પ્રત્યેના પ્રેમભાવમાં વધારો થાય છે, પણ એના કરતાં પણ વધારે મહત્વનું એ છે કે રાષ્ટ્રવાદથી રાષ્ટ્ર વિરોધી કૃત્ય પર લગામ લાગી શકે છે. રાષ્ટ્રવિરોધી કૃત્ય સરકારી અધિકારીઓ પકડી શકે કે એના દ્વારા જાહેર થાય એ કરતાં પણ વધુ મહત્વનું એ છે કે નાગરિક જ પોતાની ફરજ સમજે અને આ ફરજ એ જ સમયે સમજી શકાય છે જે સમયે રાષ્ટ્રીયતાનું મૂલ્ય સમજાય.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK