વાકોલામાં નાળાની બાજુના ઘરની દીવાલ તૂટી પડતાં ચાર મહિલા તણાઈ ગઈ
પ્રતીકાત્મક તસવીર
મુંબઈ સહિત રાજ્યમાં સોમવારે રાતે પડેલા ધોધમાર વરસાદ બાદ વાકોલા ધોબીઘાટના નાળા પાસે રહેલા એક ઘરની દીવાલ તૂટી પડી હતી અને એ દુર્ઘટનામાં ચાર મહિલાઓ તણાઈ ગઈ હતી. જોકે એમાં એક નાની બાળકી પણ હતી. એ વખતે બૂમાબૂમ મચી જતાં એક યુવાને નાળામાં ઝંપલાવીને બાળકીને બચાવી લીધી હતી અને તેને સારવાર માટે વી. એન. દેસાઈ હૉસ્પિટલમાં દાખલ કરાઈ હતી.
બીએમસી કન્ટ્રોલના જણાવ્યા અનુસાર આ ઘટના ગઈ કાલે ૧૧.૩૦ વાગ્યે બની હતી. ઘટનાની જાણ થતાં જ ફાયરબ્રિગેડનાં બે ફાયર એન્જિન, ઍમ્બ્યુલન્સ બચાવકાર્ય માટે ધસી ગયાં હતાં. બીએમસીના અધિકારીઓ અને વાકોલા પોલીસની ટીમ પણ ઘટનાસ્થળે પહોંચી ગઈ હતી. મોડી સાંજ સુધી વહી ગયેલી મહિલાઓની શોધખોળ ચલાવાઈ રહી છે.
