અમેરિકન રાષ્ટ્રપતિ ડોનાલ્ડ ટ્રમ્પના નાના ભાઈનું 71ની વયે નિધન
ડોનાલ્ડ ટ્રમ્પના નાના ભાઇ રોબર્ટ ટ્રમ્પ
અમેરિકન રાષ્ટ્રપતિ ડોનાલ્ડ ટ્રમ્પના નાના ભાઇ રૉબર્ટ ટ્રમ્પનું નિધન થયું છે. તેમણે ન્યૂયૉર્કના હૉસ્પિટલમાં અંતિમ શ્વાસ લીધા. ડોનાલ્ડ ટ્ર્મ્પે પોતે આ માહિતી આપી છે. CNNના રિપોર્ટ પ્રમાણે, રૉબર્ટ ટ્રમ્પને શનિવારે ન્યૂયૉર્કના હૉસ્પિટલમાં દાખલ કરવામાં આવ્યા હતા. વ્હાઇટ હાઉસ દ્વારા મળતી માહિતી પ્રમાણે તે છેલ્લા ઘણાં સમયથી બીમાર હતા. જો કે, અત્યાર સુધી તેમના મૃત્યુના કારણોને લઈને હૉસ્પિટલ પ્રશાસન તરફથી કોઇ માહિતી આપવામાં આવી નથી.
ભાઇના નિધન પર રાષ્ટ્રપતિ ડોનાલ્ડ ટ્રમ્પે કહ્યું કે, "ભારે હૈયે જણાવું છું કે મારા વ્હાલા ભાઈ રૉબર્ટનું આજે રાતે નિધન થઈ ગયું છે. તે ફક્ત મારો ભાઈ જ નહોતો, પણ મારો સૌથી સારો મિત્ર પણ હતો. તેની ખૂબ જ યાદ આવશે, પણ આપણે ફરી મળશું. તેમની યાદ હંમેશાં મારા મનમાં રહેશે. રૉબર્ટ, હું તને પ્રેમ કરું છું. ઇશ્વર તારી આત્માને શાંતિ અર્પે."
ADVERTISEMENT
કહેવામાં આવી રહ્યું છે કે ડોનાલ્ડ ટ્રમ્પ પોતાના ભાઈના અંતિમ સંસ્કારમાં સામેલ થશે. જો કે, તેમણે આગળના પ્લાન વિશે કોઇ જ માહિતી આપી નથી. ટ્રમ્પની દીકરી ઇવાન્કા ટ્રમ્પે થોડોક સમય પહેલાં જ ટ્વીટ કર્યું છે, "અંકલ રૉબર્ટ, અમે તમને પ્રેમ કરીએ છીએ. તમે હંમેશાં અમારા મનમાં અને પ્રાર્થનાઓમાં રહેશો."
Uncle Robert, we love you. You are in our hearts and prayers, always.
— Ivanka Trump (@IvankaTrump) August 16, 2020
અમેરિકન રાષ્ટ્રપતિ ડોનાલ્ડ ટ્રમ્પ પોતાના ભાઈના નિધનથી ખૂબ જ દુઃખી છે. જે લોકોએ શનિવારે તેમની સાથે વાત કરી, તેમણે આ બાબતની નોંધ લીધી છે. આ પહેલા શુક્રવારે ડોનાલ્ડ ટ્રમ્પે એકાએક ન્યૂયૉર્ક જવાનો નિર્ણય લીધો. તેઓ વીકેન્ડ માટે ન્યૂ જર્સી જવાના હતા. હકીકતે, ટ્રમ્પને કહેવામાં આવ્યું હતું કે રૉબર્ટ ટ્રમ્પને ન્યૂયૉર્કના મેનહેટન સ્થિત ન્યૂયૉર્ક - પ્રેસબાઇટેરિયન હૉસ્પિટલમાં દાખલ કરવામાં આવ્યા છે. રૉબર્ટ ટ્રમ્પની બીમારી વિશે અત્યાર સુધી હૉસ્પિટલ તરફથી કોઇ જ માહિતી આપવામાં આવી નથી.
