‘દબંગ’નાં ગૉગલ્સ વેચવાના નામે બોરીવલીમાં રાજકોટના યુવાન સાથે થઈ છેતરપિંડી
રાજકોટમાં રહેતો ચિંતન પટેલ પોતાની ગર્લફ્રેન્ડ સોનાલી (નામ બદલ્યું છે)ને મળવા ગઈ કાલે સવારે બોરીવલી આવ્યો હતો. સવારે તે તેની ગર્લફ્રેન્ડ સોનાલી સાથે બોરીવલી (ઈસ્ટ)માં આવેલા સંજય ગાંધી નૅશનલ પાર્કમાં ફરવા ગયો હતો. બપોરે એક વાગ્યે ગર્લફ્રેન્ડને તેના ઘરે મૂકી આવ્યા બાદ તે બોરીવલી (વેસ્ટ)માં પ્રબોધન ઠાકરે હૉલ પાસે જમવા ગયો હતો. એ વખતે એક યુવકે ચિંતન પાસે એક ગૉગલ્સ બતાવીને કહ્યું હતું કે ‘સલમાન ખાને ફિલ્મ ‘દબંગ’માં આ ગૉગલ્સ પહેર્યાં હતાં. આ ગૉગલ્સ ફક્ત ૧૦ રૂપિયાના છે, તમે ખરીદી લો.’
ઓછી રકમ હોવાને કારણે ચિંતને આ ગૉગલ્સ ખરીદી લીધાં હતાં. થોડી વારમાં યુવકના બે સાથીદારો ત્યાં પહોંચી ગયા હતા. એ વખતે ફરી તે ગૉગલ્સ વેચનારો યુવક તેની પાસે આવ્યો અને ગૉગલ્સના ૬૦૦ રૂપિયા આપવાના બાકી છે એમ કહ્યું હતું. પછી તેમણે ચિંતન પાસેથી એક હજાર રૂપિયા પડાવી લીધા હતા. તેણે આ બાબતે બોરીવલી પોલીસ-સ્ટેશનમાં ફરિયાદ નોંધાવી હતી. ઘરે જવા ચિંતન પાસે ખિસ્સામાં એક પણ રૂપિયો ન હોવાથી તેણે સોનાલીને ફોન કરી સ્ટેશન પર બોલાવી લીધી હતી. સોનાલીએ તેને રાજકોટની ટિકિટ કઢાવી આપી હતી.
