દિલ્હીમાં 16 ઉમેદવારો અભણ, 133 ઉમેદવારોનો ક્રિમિનલ રેકૉર્ડ
પ્રતીકાત્મક તસવીર
દિલ્હી વિધાનસભાની ૭૦ બેઠકો પર ૬૭૨ ઉમેદવારો પોતાની કિસ્મત અજમાવવા મેદાને ઊતર્યા છે. દિલ્હી ઇલેક્શન વૉચ દ્વારા જાહેર કરાયેલા રિપોર્ટમાં ૧૩૩ ઉમેદવારો ગુનાહિત ઇતિહાસ ધરાવે છે. ૨૪૩ ઉમેદવારો કરોડપતિ છે. ૧૬ ઉમેદવારો સાવ અંગૂઠાછાપ છે.
૧૩૩ ઉમેદવારો ગુનાહિત ઇતિહાસ ધરાવે છે અને તેમાં પણ ૧૦૪ તો એવા છે જેમના પર હત્યા, અપહરણ, બળાત્કાર અને મહિલાઓ પર અત્યાચાર જેવા કેસ દાખલ છે.
ADVERTISEMENT
૬૭૨ ઉમેદવારોમાંથી ૨૪૩ ઉમેદવારો કરોડપતિ છે જેમની આવક એક કરોડથી વધારે છે. ૧૦૫ ઉમેદવારોની સંપત્તિ પાંચ કરોડથી વધારે છે, જ્યારે ૭૨ ઉમેદવારોની સંપત્તિ બેથી પાંચ કરોડની વચ્ચે છે. કરોડપતિ ઉમેદવારોની સંખ્યામાં કૉન્ગ્રેસના ઉમેદવાર સૌથી વધારે છે. આપ બીજા નંબર પર છે અને બીજેપી ત્રીજા નંબર પર આવે છે.
તો રિપોર્ટમાં જણાવ્યું છે ૧૧૫ ઉમેદવારો એવા છે કે જેઓ ધોરણ ૫થી ૮ સુધી ભણેલા છે, જ્યારે ૧૬ ઉમેદવારો એવા છે જેઓ બિલકુલ ભણેલા નથી. ૨૯૮ ઉમેદવારો ગ્રેજ્યુએટ સુધી ભણેલા છે. કૉન્ગ્રેસે સૌથી વધુ મહિલાઓને ટિકિટ આપી છે. કૉન્ગ્રેસે ૧૦ મહિલાઓને ટિકિટ આપી છે. આપએ ૯ મહિલા ઉમેદવારોને મેદાનમાં ઉતારી છે તો વળી બીજેપીએ પણ ૬ મહિલા ઉમેદવારોને ટિકિટ આપી છે.
