મુંબઈ: સ્કૂલ-બસના ધંધાની હાલત કફોડી
બાળકો હવે ઘરેથી અભ્યાસ કરે છે એટલે સ્કૂલો બસની ફી લેતી નથી
સ્કૂલો ખૂલવા વિશે કોઈ ચોક્કસતા ન હોવાથી સ્કૂલ-બસ ઓનર્સ અસોસિએશનને ભય છે કે જ્યારે આવશ્યકતા હશે ત્યારે તેમની પાસે વાહનો નહીં હોય. મોટા ભાગની સ્કૂલો ડિજિટલ થઈ રહી હોવાથી બાળકો સ્કૂલ-બસનો ઉપયોગ કરવાના ન હોવાથી સૌથી પહેલી કપાત સ્કૂલ-બસની ફીમાં કરાઈ છે. અનેક સ્કૂલોએ બસ-કૉન્ટ્રૅક્ટ રદ કર્યા છે.
સ્કૂલ-બસ ઓનર્સ અસોસિએશને અગાઉ સરકારને વિશેષ ધ્યાન આપવા વિનંતી કરી હતી, પરંતુ સરકાર તરફથી કોઈ ઉત્તર આવ્યો નથી તેમ જ કોઈ રાજકીય પક્ષ પણ તેમની મદદ માટે આગળ આવ્યો નહોતો.
ADVERTISEMENT
હવે તેમને ભય છે કે લૉકડાઉન ખૂલ્યા બાદ અસોસિએશનના અનેક સભ્યો માટે સ્કૂલ-બસ ચલાવવી મુશ્કેલ થઈ રહેશે. માત્ર મુંબઈમાંથી જ લગભગ ૧૫,૦૦૦ જેટલાં વાહનો બિઝનેસમાંથી બહાર ફેંકાઈ જશે. મોટા ભાગનાં વાહનો બૅન્ક લોન પર લેવાયાં હોવાથી બૅન્કો આ વાહનો જપ્ત કરી લેશે તેમ જ સંઘઠનના સભ્યો પગાર ચૂકવી શકે એમ ન હોવાથી ડ્રાઇવર અને ક્લિનર્સ વિના બસો ચલાવવી અસંભવ બનશે.
આ વિષય પર બોલતાં સ્કૂલ-બસ ઓનર્સ અસોસિએશનના પ્રમુખ અનિલ ગર્ગે કહ્યું હતું કે ‘સ્કૂલો વાલીઓ પાસેથી સ્કૂલ-બસની ફી લઈ રહી ન હોવાથી અમારા નીકળતા પૈસા ચૂકવવા સક્ષમ નથી આથી સ્કૂલોએ અમારો કૉન્ટ્રૅક્ટ રદ કર્યો છે.
સ્કૂલો ક્યારે ખૂલશે એ વિશે કોઈ ચોક્કસતા નથી. અમાર માટે બિઝનેસમાં ટકી રહેવું એ મુખ્ય પ્રશ્ન છે. વધુમાં જો સ્કૂલો ચાલુ થશે તો પણ અમારે સોશ્યલ ડિસ્ટન્સિંગનાં ધોરણોનું પાલન કરતાં બાળકોની સંખ્યા ઓછી કરવી પડશે જેની સીધી અસર અમારી આવક પર પડશે.
