વેબસાઇટ્સને વાંધાજનક સામગ્રી દૂર કરવા માટે ૬ ફેબ્રુઆરીની ડેડલાઇન

દિલ્હી ર્કોટે શુક્રવારે ફેસબુક, માઇક્રોસૉફ્ટ, ગૂગલ, યાહૂ અને યુટ્યુબ જેવી ૨૧ સોશ્યલ નેટવર્કિંગ વેબસાઇટ્સ અને અન્ય વેબસાઇટ્સને ધર્મવિરોધી, સમાજવિરોધી તેમ જ વાંધાજનક સામગ્રી પ્રસિદ્ધ કરવા બદલ ભારતીય દંડસંહિતાની કલમ ૨૯૨ (વાંધાજનક સાહિત્યનું વેચાણ),

૨૯૩ (યુવાનોને વાંધાજનક સામગ્રીનું વેચાણ) અને ૧૨૦-બી (ક્રિમિનલ કાવતરું) અંતર્ગત ટ્રાયલનો સામનો કરવાના સમન્સ મોકલ્યા હતા અને હવે એમને આ વાંધાનજક સામગ્રી દૂર કરવા માટે દોઢ મહિના જેટલો એટલે કે ૬ ફેબ્રુઆરી સુધીનો સમય આપવામાં આવ્યો છે.

મેટ્રોપૉલિટન મૅજિસ્ટ્રેટ સુદેશ કુમારે એક ખાનગી ક્રિમિનલ ફરિયાદના આધારે કેન્દ્રને ‘તાત્કાલિક યોગ્ય પગલાં’ લેવાનો તેમ જ ૧૩ જાન્યુઆરી સુધી આ વિષયક અહેવાલ ર્કોટમાં ફાઇલ કરવાનો આદેશ આપ્યો હતો. જજે વેબસાઇટ્સને તાકીદ કરી છે કે જો એ આ આદેશનું પાલન નહીં કરે તો એના પર અદાલતના તિરસ્કારનો આરોપ મૂકવામાં આવશે.