સંબંધોથી તમે જોડાયા છો કે સંબંધો તમારી સાથે જોડાયેલા છે?

Published: 15th February, 2021 10:24 IST | Manoj Joshi | Mumbai

યાદ રાખવું કે સંબંધો નહીં બંધાય કે નહીં જોડાય એ ચાલી શકે, પણ સંબંધો તૂટે એ ન ચાલવું જોઈએ. એક પણ પક્ષથી અને એક પણ દિશાએથી.

પ્રતીકાત્મક તસવીર
પ્રતીકાત્મક તસવીર

સંબંધોના મૅનેજમેન્ટની વાત આવે ત્યારે દરેક વ્યક્તિ પોતાના પક્ષે ઉધારી માંડીને બેસી જતી હોય છે. જમા-ઉધાર અને નફો-નુકસાન જ્યારે સંબંધોમાં જોવાય છે ત્યારે મોટા ભાગે ખોટ સંબંધોએ ભોગવવી પડે છે અને સંબંધોમાં જ્યારે ખોટ આવે છે ત્યારે એ સંબંધો તૂટવાની કગાર પર આવીને ઊભા રહી જાય છે. યાદ રાખવું કે સંબંધો નહીં બંધાય કે નહીં જોડાય એ ચાલી શકે, પણ સંબંધો તૂટે એ ન ચાલવું જોઈએ. એક પણ પક્ષથી અને એક પણ દિશાએથી.

ક્યારેય નહીં અને કોઈ જ દિવસ નહીં. સંબંધો માટે ઘસાવામાં અનેક લોકોને એની તકલીફ પડતી હોય છે, પણ તકલીફ પડતાં સૌકોઈએ એક વાત યાદ રાખવી જોઈએ કે જેમાં ઘસાવું પડે એનું જ નામ સંબંધો, બાકી બધા તો વ્યવહાર હોય. જેમાં આદાન-પ્રદાનનો હિસાબ થઈ જાય અને આદાન-પ્રદાનની નીતિરીતિ અપનાવી લેવામાં આવે. ફલાણાએ લગ્નમાં આટલાનું કવર કર્યું હતું તો એટલા રૂપિયાનો જ વ્યવહાર આપણે કરવાનો હોય. આ જે નીતિ છે એ નીતિવ્યવહાર છે અને ફલાણાનાં લગ્નમાં આપણે સૌથી પહેલાં જઈને ઊભા રહીશું તો તેને કામ લાગીશું. આ જે નીતિ છે એ સંબંધ છે. કોઈના સુખે સુખી થઈએ એ વ્યવહાર હોઈ શકે, પણ કોઈના દુઃખે પારાવાર પીડા થાય એ સંબંધનું પ્રતીક છે. સંબંધો જાળવવા માટે એક પણ પ્રકારના મૅનેજમેન્ટની જરૂર નથી, ક્યારેય નહીં અને કોઈ જ દિવસ નહીં. સંબંધો માટે કોઈ રિલેશનશિપ કાઉન્સિલરની પણ આવશ્યકતા હોય, એવું પણ ધારવું ગેરવાજબી છે.

કેવી રીતે જીવવું એ જો તમને દુનિયાનું કોઈ ત્રાહિત માણસ શીખવે તો માની લેવાનું કે તમે સંબંધોને લાયક નથી અને તમારી લાયકાત લાગણીઓની પણ નથી. કેવી રીતે જીવવું એ કઈ રીતે બીજું કોઈ ત્રાહિત શીખવી શકે અને એ પણ એવું ત્રાહિત જેની સાથે તમારા કોઈ વ્યવહારો નથી, તમારી સાથે એનું કોઈ જોડાણ નથી અને એક તબક્કે તમે તેને ઓળખતા પણ નહોતા. આ પ્રકારનું કાઉન્સિલિંગ એ અમેરિકન વિધિ છે, એક એવી વિધિ જે વિધિની સીધી ઉઠાંતરી કરવામાં આવી છે. બિલકુલ એવી જ રીતે જેવી રીતે આપણે સીધા બ્રિટનના ડિટેક્ટિવને ઉપાડી લાવ્યા. આપણો ડિટેક્ટિવ ઓવરકોટ પહેરે છે અને માથે ટોપી પહેરે છે. મુંબઈની આ ગરમીમાં એક વાર ઓવરકોટ અને હૅટ પહેરીને નીકળો તો ખરા ભાઈ, પ્રેસરકુકરમાં બફાઈ ગયેલા બટાટા જેવી હાલત થાય એવી હાલત થઈ જાય. જો આપણો ડિટેક્ટિવ ઓવરકોટ પહેરે તો ન ચાલે તો એવી જ રીતે, આપણા સંબંધોને સંભાળવા અને સમજવા માટે કોઈ ત્રાહિત પાસે સલાહ લેવા જવું પડે એ પણ ન ચાલે, ન ચાલી શકે. તમારા સંબંધો છે અને તમારા આ સંબંધોને તમારે જ હૅન્ડલ કરવાના છે, મૅનેજ કરવાના છે અને એ કરવા જ પડશે. એ વિના નહીં ચાલે. જો કોઈ બીજું જમે અને તમારું પેટ ભરાઈ જતું હોય તો કોઈ તમને કેવી રીતે સંબંધો સાચવવા એની સલાહ આપે એ ચાલે, પણ એવું થતું નથી એની તમને ખબર છે અને આ જ જાણકારીને અંગત સંબંધો સાચવી રાખવા માટે યાદ રાખવાની છે.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK