રોષે ભરાયેલા રિપબ્લિકન્સે કહ્યું ‘અમેરિકા કંઈ ચીન નથી’
અમેરિકાના રાષ્ટ્રપતિ ડોનલ્ડ ટ્રમ્પનું ટ્વિટર અકાઉન્ટ થયું સસ્પેન્ડ. (તસવીર: પી.ટી.આઇ.)
સોશ્યલ નેટવર્કિંગ સાઇટ ટ્વિટર પર પ્રમુખ ડોનલ્ડ ટ્રમ્પનું અકાઉન્ટ કાયમી ધોરણે ડિઍક્ટિવેટ કરવાના પગલા સામે રિપબ્લિકન પાર્ટીના કાર્યકરો સહિત અનેક લોકોએ વિરોધ વ્યક્ત કર્યો હતો. ટ્વિટરના સંચાલકોના આ પગલાની ટીકા કરતાં ભારતીય મૂળનાં અમેરિકી રાજકારણી નિક્કી હેલી સહિત અનેક લોકોએ કહ્યું હતું કે ‘અમેરિકા એ કંઈ ચીન નથી.’
વૉશિંગ્ટનના સત્તાધારી રાજકારણીઓના કેપિટલ હિલ વિસ્તારમાં ગયા અઠવાડિયે થયેલી હિંસા માટે સોશ્યલ નેટવર્કિંગ સાઇટ્સને પણ જવાબદાર ગણાવવામાં આવી હતી તેથી વધારે હિંસા ન થાય એની તકેદારી રાખવા માટે ડોનલ્ડ ટ્રમ્પનું ટ્વિટર હેન્ડલ કાયમી ધોરણે બંધ કરવામાં આવ્યું હતું.
ADVERTISEMENT
નિક્કી હેલીએ ગઈ કાલે ટ્વિટર પર જણાવ્યું હતું કે લોકોના મોઢાં બંધ કરવાં અને અમેરિકાના પ્રમુખનો ઉલ્લેખ નહીં કરવાનાં ફરમાન આપવાં, એ બધું ચીનમાં બને, આપણા દેશમાં નહીં. જોકે લોકોની હિંસા માટે ઉશ્કેરણી કરતી પોસ્ટસ લખવા અને પ્રસાર માધ્યમો સમક્ષ એવા ઉચ્ચારણો કરવા બદલ રિપબ્લિકન પાર્ટી સહિત વિવિધ પક્ષોના રાજકીય નેતાઓએ ડોનલ્ડ ટ્રમ્પની ટીકા કરી હતી.