કથાકાર ભૂપેન્દ્ર પંડ્યા પર પત્નીના સનસનાટીભર્યા આરોપ

અંકિતા શાહ

મુંબઈ, તા. ૨૩

સમતાનગર પોલીસ-સ્ટેશનનાં એક લેડી પોલીસ-અધિકારીએ ‘મિડ-ડે’ને નામ ન આપવાની શરતે કહ્યું હતું કે ‘મનીષાબહેને તેમની ફરિયાદમાં એવું જણાવ્યું છે કે ભૂપેન્દ્રભાઈનાં મારી સાથે લગ્ન થયાં ત્યારથી તેઓ મારાં મા-બાપ પાસેથી પૈસા લાવવાનું મને કહેતા રહેતા હતા. મારાં મા-બાપે ઘર પણ લઈ આપ્યું હતું. ભૂપેન્દ્રભાઈની સાથે-સાથે મારી દીકરી અને હું પણ પ્રવચન આપતાં હતાં અને ત્રણેયનું મળીને જે પેમેન્ટ આવતું હતું એ ભાગ પાડવાને બદલે ભૂપેન્દ્રભાઈ જ લઈ લેતા હતા. મારા અને નમસ્વીના નામે જે પણ અકાઉન્ટ હતાં એમાંથી મારી જાણ વગર અમુક પૈસા કઢાવવામાં આવ્યા હોવાની જાણ પણ મને થઈ હતી.’

પોલીસે ભૂપેન્દ્રભાઈ વિરુદ્ધ દહેજ માટે ત્રાસ આપવાનો તેમ જ છેતરપિંડી અને વિશ્વાસઘાત કરવાનો ગુનો નોંધ્યો હોવાનું આ અધિકારીએ જણાવ્યું હતું. અધિકારીએ મનીષાબહેનની ફરિયાદની વિગત આપતાં વધુમાં કહ્યું હતું કે ‘મનીષાબહેનના નામે જે ફિક્સ્ડ ડિપોઝિટ હતી એ પણ તેમને કહ્યા વગર કાઢી લીધી હતી. ઇન્શ્યૉરન્સની અમુક પૉલિસીના પૈસા મેળવવા માટે ખોટા ડૉક્યુમેન્ટ્સ રજૂ કરીને અને બનાવટી સિગ્નેચર કરીને ઇન્શ્યૉરન્સ કંપની પાસેથી પૈસા મેળવવાનો પણ ભૂપેન્દ્રભાઈએ પ્રયાસ કયોર્ હતો. જે પૉલિસીઓ ૧૦-૧૫ વર્ષ પછી પાકવાની હતી એ સરેન્ડર કરી એના પૈસા મેળવવા પણ તેમણે છેતરપિંડી કરી હતી. મનીષાબહેને એ પૉલિસીઓ બાળકોને તેમના એજ્યુકેશન અને લગ્ન માટે કામ લાગે એ ગણતરીથી જ લીધી હતી.’

ભૂપેન્દ્ર પંડ્યાનો સંપર્ક થઈ શક્યો નહોતો, જ્યારે મનીષાબહેનને સંપર્ક કરતાં તેમણે કંઈ પણ કહેવાનો ઇનકાર કરી દીધો હતો.