સુરત પછી હવે સૌરાષ્ટ્ર-કચ્છમાં પણ પાન-માવાની દુકાનોને તાળાં?

Published: Jul 05, 2020, 08:13 IST | Rashmin Shah | Rajkot

આવી વાતથી રાતોરાત સિગારેટ, ગુટકા, માવાના ભાવમાં ૨૦-૩૦ ટકાનો વધારો. ગુજરાતમાં ગઈ કાલે એક દિવસમાં કોરોનાના રેકૉર્ડબ્રેક 712 કેસ નોંધાયા ત્યારે ગુજરાતમાં અત્યારે કોરોનાના કુલ 35398 કેસ છે

પ્રતીકાત્મક તસવીર
પ્રતીકાત્મક તસવીર

ગુજરાતમાં ગઈ કાલે એક દિવસમાં કોરોનાના રેકૉર્ડબ્રેક 712 કેસ નોંધાયા

ગુજરાતમાં અત્યારે કોરોનાના કુલ 35398 કેસ છે

સુરત શહેરના કતારગામ અને વરાછા-‘એ’ તથા ‘બી’ ઝોનમાં પાન-માવા અને સિગારેટના વેચાણ પર પ્રતિબંધ અને ચાની લારી, કીટલી અને હોટેલ બંધ કરાવવાનો ઑર્ડર આપ્યા પછી હવે ગુજરાત સરકાર આ જ નિયમ સૌરાષ્ટ્ર-કચ્છમાં લાવવાનું વિચારી રહી છે. પાન-માવા અને સિગારેટનું વ્યસન ધરાવનારાઓ સુપરસ્પ્રેડર બને છે એવું પુરવાર થતાં ગુજરાત સરકારના હેલ્થ ડિપાર્ટમેન્ટના સચિવ ડો. જયંતી રવિએ આ ચીજવસ્તુઓના વેચાણ પર પ્રતિબંધ મૂકવાનું સૂચન કર્યું છે. આ વાત બહાર આવતાં રાતોરાત સિગારેટ, ગુટકા અને માવાની સંઘરાખોરી શરૂ થઈ ગઈ છે, જેને લીધે ફરી એક વાર આ બધી ચીજવસ્તુઓના ભાવમાં ગઈ કાલે ૨૦થી ૩૦ ટકાનો ઉછાળો આવ્યો હતો, તો ગુટકાના ભાવ વધીને દોઢ ગણા થઈ ગયા હતા.
ગુજરાતમાં વધી રહેલા કોરોના-સંક્રમણની પાછળ ક્યાંક ને ક્યાંક પાન-માવાની દુકાનો અને ચાની હોટેલો જવાબદાર હોવાનું લાગતાં આ બન્ને સેન્ટરો બંધ કરવા વિશે વિચારણા શરૂ થતાં એક પ્રશ્ન એ પણ ઊભો થયો છે કે જો આ પાન અને ચાની દુકાનો બંધ જ કરવાની હતી તો એ ખોલવાનો આદેશ શું કામ આપ્યો? આ દુકાનો પર લોકોની ગિરદી થતી હોવાથી પણ કોરોના-સંક્રમણ માટે આ દુકાનો જવાબદાર બને છે. જોકે નિયમો બનાવવામાં જ આવ્યા હતા કે દુકાન પર ચારથી વધારે લોકોએ એકત્રિત થવું નહીં. આ નિયમોનું પાલન થયું નથી એવું જયંતી રવિનું કહેવું છે તો આ કામમાં પણ કોની નિષ્ફળતા ગણવી એ પણ પ્રશ્ન ઊભો થયો છે. ગઈ કાલે ‘મિડ-ડે’એ જયંતી રવિ સાથે વાત કરી ત્યારે તેમણે કહ્યું કે ‘સમય મુજબ નિર્ણયો લેવાતા રહે એ બહુ જરૂરી છે.’

Loading...
 
 
Loading...
Loading...
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK