મને મનમોહન સિંહની દયા આવે છે, તેઓ સૌથી નબળા વડા પ્રધાન :અડવાણી

Published: 18th October, 2011 17:49 IST

નાગપુર (મહારાષ્ટ્ર): બીજેપીના સિનિયર નેતા લાલકૃષ્ણ અડવાણીએ વડા પ્રધાન મનમોહન સિંહની આલોચના કરતાં કહ્યું હતું કે ‘યુપીએ (યુનાઇટેડ પ્રોગ્રેસિવ અલાયન્સ) સરકારની સ્થિતિ વિશે મને દયા ઊપજે છે. એક સમયે જેમનો હું આદર કરતો હતો તે મનમોહન સિંહ પર મને હવે દયા ઊપજે છે.’



પોતાની રથયાત્રા નાગપુરમાં પ્રવેશી એ વેળાએ એક મીટિંગને સંબોધતાં અડવાણીએ કહ્યું હતું કે ‘વડા પ્રધાન મનમોહન સિંહ મેં જોયેલા સૌથી નબળા વડા પ્રધાન છે. આઇ. કે. ગુજરાલ, ચંદ્રશેખર અને એચ. ડી. દેવગોવડા જેવા વડા પ્રધાનો પાસે ગણ્યાગાંઠ્યા સંસદસભ્યો હોવા છતાં તેમણે તેમના કરતાં બહેતર કામગીરી બજાવી હતી. તેમની પાસે ૧૦-૧૫ સંસદસભ્યો હોવા છતાં વડા પ્રધાનના હોદ્દાને લીધે તેઓ મજબૂત બન્યા હતા. મેં જ્યારે ૨૦૦૯ની ચૂંટણી પહેલાં તેમને નબળા વડા પ્રધાન કહ્યા હતા ત્યારે લોકોએ મને સવાલ કર્યો હતો કે આવા પ્રામાણિક અને સારા માણસને હું કેમ નબળો કહું છું. તેમને નબળા કહેવા એ ગાળ ભાંડવા જેવું નથી. ૧૦, જનપથની મંજૂરી વિના હું કશું કરી નથી શકતો એમ વડા પ્રધાન માને તો તેઓ પોતાની ગરિમા ઓછી કરે છે.’
Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK