Gujarati Mid-day

ઇ-પેપર

વેબસ્ટોરીઝ

વેબસ્ટોરીઝ


હોમ > સમાચાર > મુંબઈ સમાચાર > આર્ટિકલ્સ > ૮ મહિનાથી ૭ મિનિટને બદલે ૪૫ મિનિટ

૮ મહિનાથી ૭ મિનિટને બદલે ૪૫ મિનિટ

22 December, 2012 10:40 AM IST |

૮ મહિનાથી ૭ મિનિટને બદલે ૪૫ મિનિટ

૮ મહિનાથી ૭ મિનિટને બદલે ૪૫ મિનિટ





નડતરરૂપ : કુર્લાથી સાયન તરફ જતા એલબીએસ રોડ પરના લૂપ રોડ જંક્શન પર છેલ્લા આઠેક મહિનાથી ખોદી કાઢવામાં આવેલો ખાડો. તસવીર : સપના દેસાઈ



(સપના દેસાઈ)

સાયન, તા. ૨૨

કુર્લાથી સાયન તરફ જતા એલબીએસ રોડ પરના લૂપ રોડ જંક્શન પર છેલ્લા આઠેક મહિનાથી રસ્તાની વચ્ચોવચ ખોદી કાઢવામાં આવેલા ખાડાને કારણે મોટરિસ્ટો હેરાન-પરેશાન થઈ ગયા છે. કહેવાય છે કે આ ખાડો અન્ડરગ્રાઉન્ડ ગટરના કામ માટે ખોદવામાં આવ્યો હતો, પણ કેટલીક મંજૂરી મેળવવાની બાકી હોવાથી એનું કામ હજી સુધી શરૂ નથી થઈ શકયું. આ ખાડાને લીધે સૌથી વધુ જો કોઈને ત્રાસ ભોગવવો પડતો હોય તો એ માર્ગેથી વેસ્ટર્ન એક્સપ્રેસ હાઇવે અને દાદર ટર્મિનસ તરફ જતા લોકોને છે.

આ રસ્તા પરથી દરરોજ કુર્લાથી વાશી જતા અને કુર્લા (વેસ્ટ)માં રહેતા બિઝનેસમૅન હીરેન વીરાએ ‘મિડ-ડે’ને કહ્યું હતું કે ‘છેલ્લા આઠેક મહિનાથી હું અહીં આ રસ્તામાં વચ્ચોવચ ખાડો જોઈ રહ્યો છું. મારી ઑફિસ વાશીમાં આવેલી હોવાથી હું રોજ કુર્લા-સાયન એલબીએસ માર્ગથી ચેમ્બુર થઈને વાશી પહોંચું છું. કુર્લાથી સાયન જતાં માંડ સાતથી આઠ મિનિટ થતી હોય છે ત્યારે આ ખાડાને લીધે સવાર-સાંજ બન્ને સમયે આટલું અંતર કાપતાં મને ઓછામાં ઓછો પોણો કલાક થાય છે. દરરોજ અહીં અડધોથી પોણો કિલોમીટર લાંબો ટ્રાફિક જૅમ થતો હોય છે. ખાડાને લીધે અહીં આ રસ્તા પરથી ત્રણ લેનમાં ગાડી જવી જોઈએ એને બદલે સિંગલ ગાડીઓ પાસ થતી હોય છે. એને કારણે લોકોનો કીમતી સમય બરબાદ થવાની સાથે લાખો રૂપિયાનું રોજનું પેટ્રોલ-ડીઝલ બરબાદ થાય છે, પણ કોઈને કંઈ પડી નથી.’

લૂપ રોડ જંક્શનને ટ્રાફિક-પોલીસ કચરપટ્ટી સિગ્નલ કહે છે. એ સિગ્નલ પર ડ્યુટી કરી રહેલા એક ટ્રાફિક-કૉન્સ્ટેબલે નામ ન આપવાની શરતે ‘મિડ-ડે’ને કહ્યું હતું કે ‘એલબીએસ માર્ગ પહેલેથી હેવી ટ્રાફિકવાળો રોડ ગણાય છે. એક તો અહીં રસ્તો સાંકડો છે. એમાં આ લોકોએ સિગ્નલથી સો ફૂટના અંતરે ખાડો ખોદી મૂક્યો છે એને લીધે થતા ટ્રાફિક જૅમને ક્લિયર કરતાં અમારા નાકે દમ આવી જાય છે. સિગ્નલની ડ્યુટી છોડીને અમારે આ ખાડા પાસે ઊભા રહીને એક-એક ગાડી બહાર કાઢવી પડે છે, જે પીક-અવર્સમાં અમારા માટે માથાનો દુખાવો બની જાય છે. અમે અમારા ઉપરી અધિકારીઓને કહી-કહીને થાકી ગયા, પણ તેઓ પણ અમારી વાત પર ધ્યાન આપતા નથી. ’



અમને જાણ નથી : સુધરાઈ


છેલ્લા આઠેક મહિનાથી એલબીએસ માર્ગ પર બરોબર વચ્ચે ખાડો ખોદીને મૂકવામાં આવ્યો છે એ બાબતે જી-નૉર્થ વૉર્ડના સુધરાઈના સિવરેજ ઍન્ડ વેસ્ટ મૅનેજમેન્ટ ડિપાર્ટમેન્ટના પ્રોજેક્ટ ડિપાર્ટમેન્ટના અધિકારીએ પોતાને આ ખાડા વિશે કોઈ જાણ ન હોવાનું કહ્યું હતું, જ્યારે જી-નૉર્થના વૉર્ડ-ઑફિસર શરદ ઊઘડેએ ‘મિડ-ડે’ને આ બાબતે પૂરી તપાસ કરવામાં આવશે એવું જણાવ્યું હતું.


અમે જવાબદાર નથી : કૉન્ટ્રૅક્ટર


એલબીએસ માર્ગ પર ખોદી મૂકવામાં આવેલા ખાડા બાબતે સાઇટ પર રહેલા કૉન્ટ્રૅક્ટરે નામ ન આપવાની શરતે ‘મિડ-ડે’ને કહ્યું હતું કે ‘સાયન ઈસ્ટ અને વેસ્ટ વચ્ચે ગટરની પાઇપલાઇનનું અન્ડરગ્રાઉન્ડ કામ ચાલી રહ્યું છે અને એને માટે આ ખાડો ખોદવામાં આવ્યો હતો, પણ અમુક મંજૂરી ન મળવાને લીધે કામ અટકી પડ્યું છે. એ માટે અમે જવાબદાર નથી.’

એલબીએસ  = લાલ બહાદુર શાસ્ત્રી


Whatsapp-channel Whatsapp-channel

22 December, 2012 10:40 AM IST |

App Banner App Banner

અન્ય લેખો


X
ક્વિઝમાં ભાગ લો અને જીતો ગિફ્ટ વાઉચર
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK