જાણો મુંબઈની 5 ખાઉ ગલી વિશે, જી લલચાયે રહા ના જાયે!

મુંબઈની એકદમ પ્રખ્યાત ખાઉ ગલી છે જુહુ ચોપાટીની ખાઉ ગલી! અહીંનું સ્ટ્રીટ ફૂડ મુંબઈના લોકલાઇટ્સ અને બહારથી આવતા પ્રવાસીઓમાં પણ ખૂબ ફેમસ છે. જુહુની પાંવભાજી, ચાટ, ઢોંસા અને ચાઇનીઝ જેવા સ્ટ્રીટ ફૂડની સાથે ત્યાંના ગોળા અને કુલ્ફીની મજા લોકો ખૂબ માણતા હોય છે. જુહુની ચાટ તો એકદમ ટેસ્ટી હોય છે. અને જો તમે જુહુ જતા જ હોવ તો એના માવા ગોળો ખાધા વગર તો તમે પાછા આવી જ ન શકો. 

જુહુ ચોપાટી જેવી જ મુંબઈની બીજી ચોપાટી છે મરીન લાઇન્સ પાસે આવેલી ગીરગાંવ ચોપાટી. મરીન લાઇન્સ ફરવા આવેલા સહેલાણીઓનું ડિનર પછી ગીરગાંવ ચોપાટી પર જ થાય. ત્યાંના પાંવભાજી, પુલાવ ને સેન્ડવિચ ને ભેળ તો લોકો હોંશે-હોંશે ને મનભરીને ખાય. જુહુની ચોપાટીની જેમ જ અહીંયા પણ ગોળો, કુલ્ફી ને મિલ્કશેક જેવા એકદમ ટેસ્ટી સ્ટ્રીટ ડેઝર્ટ્સ મળે છે. ગીરગાંવ ચોપાટી જાવ તો ત્યાં પાન ફ્લેવર ફાલુદા કુલ્ફી ખાવાનું ભૂલાય નહીં!

મુંબઈના કાંદિવલી વેસ્ટમાં આવેલા મહાવીરનગરની ખાઉ ગલી પણ મુંબઈગરાઓમાં ખૂબ ફેમસ છે. અહીંયા તમને સ્ટ્રીટફૂડથી માંડીને સ્ટારબક્સ સુધીના કેફે મળી જશે. તમને જે પ્રકારનું ફૂડ પસંદ છે એ તમને અહીંયા મળશે. અહીંયા ખાસ કરીને પ્યોર મિલ્ક સેન્ટરના ચીઝ બર્સ્ટ ઢોંસા લોકોમાં ખૂબ ફેમસ છે. ચીઝથી લથબથ આ ઢોંસા તમારા મોઢામાં ચીઝનો જ્વાળામુખી લાવી દે, બોસ જલસો પડી જાય. 

કોલેજના યુવા હૈયાઓનો ફેવરિટ ખાણીપીણી વિસ્તાર એટલે ઘાટકોપરની ખાઉ ગલી! સ્ટ્રીટ ફૂડનું નામ પડે અને મુંબઈના લોકોને સૌથી પહેલું ઘાટકોપર યાદ આવે. પિઝા, પાસ્તા, ચાટ, સેન્ડવિચ, વડાપાંઉ, ભેલપુરી ને તમામ પ્રકારના સ્પાઇસી સ્ટ્રીટ ફૂડ માટે ઘાટકોપર ફેમસ છે. અહીંયા ખાસ કરીને રિમિક્સ ઢોંસા એકદમ ફેમસ છે. કાંદિવલીની જેમ ઘાટકોપરનું પ્યોર મિલ્ક સેન્ટર પણ ખૂબ ફેમસ છે. ઘાટકોપર મસ્ટ વિઝિટ ખાઉ ગલી છે. અહીંયા થાઉઝન્ડ આઇલેન્ડ ઢોંસા અને આઇસક્રીમ ઢોંસા પણ મિસ કરવા જેવા નથી. 

મુંબઈમાં આવેલા ઝવેરી બજારની ખાઉ ગલી પણ સ્વાદ રસિયાઓમાં ખૂબ ફેમસ છે. ખાસ કરીને ઝવેરી બજારના મસાલા ખિચિયા પાપડ તો લોકો ખૂબ હોંશથી ખાય છે. મોટા શેકેલા ખિચિયા પાપડ પર 3 જાતની ચટણીઓ, કાંદા-ટામેટાં-કોબીનું સલાડ અને ઉપર ઝીણી સેવ ભભરાવીને આપે તો જલસો પડી જાય. આ ઉપરાંત, ઢોંસા, ભેલપુરી, સેવપુરી, પાણીપુરી વગેરે સ્ટ્રીટફૂડ પણ ઝવેરી બજારમાં એકદમ સ્વાદિષ્ટ મળે છે.