તુવેરના શાકમાં પાણી વધુ પડી ગયું ને બની એક સ્પેશ્યલ રેસિપી (મારા કિચનના પ્રયોગો)

Published: 13th December, 2012 05:47 IST

જોકે નાલાસોપારાનાં વનિતા દોઢીવાલાએ રસોઈમાં ગરબડ થયા બાદ એને ખૂબ સારી રીતે સાચવી લીધી



(મારા કિચનના પ્રયોગો - અર્પણા ચોટલિયા)

‘રસોઈ બનાવનારી વ્યક્તિ ગુસ્સામાં હશે તો ખાવાવાળાને પણ ગુસ્સો જ આવશે’ આવું વિચારતાં મૂળ સાયલાનાં સ્થાનકવાસી જૈન જ્ઞાતિનાં વનિતાબહેન દોઢીવાલા રસોઈ બનાવવાનાં જેટલાં શોખીન છે એટલાં જ ખાવાનાં પણ શોખીન છે. તેમને એ બધી જ ચીજો બનાવવી ગમે છે, જે તેમનાં બાળકો ડિમાન્ડ કરે. નવી વાનગીઓ ટ્રાય કરવાનો તેમને શોખ છે, જે મોટા ભાગે તો સારી જ પણ બને છે પણ ક્યારેક ગરબડ પણ થઈ જાય છે. જોઈએ કેવી રીતે એક વાર તેમણે બગડતી ડિશને સુધારી બેસ્ટ બનાવી દીધી હતી.

શાકનાં વડાં

શિયાળાની જ સીઝન હતી અને તુવેરના લીલવાનું રસાવાળું શાક બનાવવાનો પ્લાન હતો.  એ શાક મેં થોડી જુદી રીતે બનાવવાનું પ્લાન કર્યું હતું. છાશ ઉમેરીને સરસ રસાવાળા શાકનો પ્લાન હતો, પરંતુ એ શાક મેં વઘાર્યા બાદ એમાં પાણી ઉમેરી દીધું અને એ પણ વધારે પડતું. એ પછી એને શાક તરીકે ઉપયોગમાં લઈ શકાય એમ હતું જ નહીં. શાક વધારે પ્રમાણમાં બનાવ્યું હતું એટલે ફેંકી દેતાં પણ જીવ ન ચાલ્યો. પછી મેં વડાં વિશે વિચાર્યું અને એ જ શાકને ઊકળવા દીધું. ઊકળ્યું એટલે એમાં ઢોકળાનો અને ઘઉંનો લોટ ઉમેર્યો. ત્યાર બાદ લોટને બાફી લીધો અને એના હાથેથી જ વડાં જેવું બનાવી તળી લીધાં. અને અનાયાસે જ સરસ એવાં તુવેરના લીલવાનાં વડાં બની ગયાં. આ વડાં ઘરમાં બધાને એટલા ભાવ્યાં કે પછીથી એ ભૂલભર્યું લીલી તુવેરનું શાક જાણીજોઈને વારંવાર બને છે. ઘરમાં બધાને જ આ લીલવાનાં વડાં ખૂબ ભાવે છે. અવારનવાર ડિમાન્ડ પણ કરે.

ખાવાનો ને બનાવવાનો શોખ

મને જેટલો નવી-નવી રસોઈ બનાવવાનો શોખ છે એનાથી વધારે ખાવાનો શોખ છે અને મારા ઘરમાં બધાને જ ખાવાનો ભરપૂર શોખ છે એટલે ખાવામાં કોઈ કંજૂસાઈ નહીં. તેલ-મસાલા પર કોઈ બંદિશ નહીં, જે બને એ પરફેક્ટ અને સારી રીતે જ બનાવાય જેથી ટેસ્ટી લાગે. અત્યારે ઓળાની સીઝન છે ત્યારે જો એમાં તેલ ઓછું નાખવામાં આવે તો એનો ટેસ્ટ સારો નહીં લાગે એટલે આવી ચીજોમાં તેલ-મસાલા ચઢિયાતાં હોવા જરૂરી છે. મને ગુજરાતી, પંજાબી અને ચાઇનીઝ ફૂડ બનાવવું ગમે છે. ઘરે નૂડલ્સ અને ડ્રાય મન્ચુરિયન બને. અમે જૈન છીએ એટલે આ બધી આઇટમો જૈન બને. મારા હાથની પાંઉભાજી મારા દીકરા અને દીકરી બન્નેને ખૂબ ભાવે છે. પાંઉભાજી તેઓ બહારની પણ ન ખાય, ઘરની જ જોઈએ.

અખતરામાં સપોર્ટ


મને નવી-નવી ચીજો બનાવવાનો એટલે કે અખતરા કરવાનો ભરપૂર શોખ છે અને આ અખતરા કરવા માટે મને ઘરમાંથી ખૂબ પ્રેરણા મળે છે. મારા હસબન્ડ કહે કે તને રસોઈનો શોખ છે તો પૂરો કર. જે બનાવવું હોય એ બનાવ. મારાં બાળકો પણ મને સપોર્ટ કરે અને જે બનાવું એ સારી છે કે ખરાબ એ રિવ્યુ ખાધા બાદ તરત આપી દે. અમુક ચીજો જો બનાવતાં ન આવડતી હોય તો મારો દીકરો અને દીકરી તેમને કેવો સ્વાદ જોઈએ છે એ પ્રમાણે સમજાવીને બનાવડાવે. હું ટીવીમાંથી જોઈને રેસિપીઓ નોટ કરીને પણ રાખું છું.

બધું જ ઘરે

ખાવાનો શોખ છે, પરંતુ બહારનું ખાવાનો નહીં. જે પણ ખાવું હોય એ અમે ઘરે જ બનાવીએ. પછી એ સૂપ હોય, નૂડલ્સ કે પછી આપણી કોઈ પરંપરાગત વાનગી. આ સીઝનમાં મેથીના લાડુ અને સૂંઠનો પાક વગેરે બનશે. એ સિવાય બાળકો જે પણ ખાવાની ડિમાન્ડ કરે એ ઘરે જ બને.

ગાર્નિશિંગ જરૂરી

મારા મતે ગાર્નિશિંગ ખૂબ જરૂરી છે. જો ચીજ સજાવેલી હોય તો એ ખાવામાં પણ મજા આવશે. ડિશ એવી હોવી જોઈએ કે જે જોઈને જ ખાવાનું મન થઈ જાય. હું કોથમીરથી, જુદી-જુદી રીતે કાપેલા સૅલડથી તો ક્યારેક સેવથી ડિશોને સજાવું છું. રસોઈને ટેસ્ટ કરતાં પહેલાં આપણે એને જોઈએ છીએ એટલે એ સુંદર હોય એ જરૂરી છે.

પ્રેમથી બનાવો

રસોઈ બનાવો ત્યારે ખૂબ જ પ્રેમથી બનાવવી જોઈએ. ગુસ્સાથી બનાવશો તો ખાનારને પણ ગુસ્સો આવશે. શાંત મને પ્રેમથી બનાવશો તો એ ડિશનો પણ સ્વાદ એટલો જ મધુર હશે. આ સિવાય રસોડું ચોખ્ખું હોય એ ખૂબ જરૂરી છે. રસોઈ બનાવ્યા બાદ રસોડું ચોખ્ખું કરીએ એ રીતે રસોઈ કરતાં હોઈએ ત્યારે પણ રસોડું ચોખ્ખું જ હોવું જોઈએ.

તસવીરો : વિલ્સન રનભિષે

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK