આ ઓલ્ડી ગોલ્ડી કપલની મોટર ચાલી પોમ પોમ પોમ

પોતાની ગાડીમાં જ દુનિયા ફરવાનું સપનું જોનારા મલાડના આ કપલમાં ડ્રાઇવિંગની જવાબદારી ૬૫ વર્ષનાં હંસા સાવલાની છે અને આઇટિનરરી રેડી કરે છે તેમના ૬૯ વર્ષના હસબન્ડ જગજીવનભાઈ.

હંસા સાવલા અને જગજીવનભાઈ

છેલ્લાં ત્રણ વર્ષમાં મહારાષ્ટ્ર, આંધ્ર પ્રદેશ, તામિલનાડુ, કેરળ, ગુજરાત અને રાજસ્થાન આટલાં રાજ્યોનાં ઓછાં જાણીતાં સ્થળોએ તેઓ લગભગ ૫૫ હજાર કિલોમીટર જેટલું અંતર પોતાની મોટરગાડીમાં કાપી ચૂક્યાં છે

રુચિતા શાહ
ruchita@mid-day.com
‘માય વાઇફ ઇઝ પ્રિપેડ લાઇફ લૉન્ગ ડ્રાઇવર ફૉર મી.’ 
ફોટોગ્રાફીના પ્રોફેશનમાંથી નિવૃત્ત થયેલા ૬૯ વર્ષના જગજીવનભાઈ બહુ પ્રાઉડલી આમ કહે છે. હકીકતમાં અત્યારે આ કપલ તામિલનાડુની ટ્રિપ પર છે અને તેઓ છેલ્લાં ચાર વર્ષથી પોતાની બધી જ ટ્રિપ બાય રોડ જાતે કરે છે અને એમાં ડ્રાઇવિંગ સીટ પર હોય છે તેમનાં ૬૫ વર્ષનાં પત્ની. અત્યારે પણ તેમણે લગભગ ૫૫ હજાર કિલોમીટરનો પ્રવાસ પાર પાડ્યો છે, જેમાંથી લગભગ પચાસ હજાર કિલોમીટરનું ડ્રાઇવિંગ તેમનાં પત્નીએ કર્યું છે. પોતાની ગાડી લઈને ફરવા જવાનો એક જુદો જ અનુભવ હોય છે એ આ ઓલ્ડી ગોલ્ડી કપલ પાસેથી જાણવા જેવું છે. મલાડમાં રહેતાં જગજીવનભાઈ અને હંસાબહેનને ફરવાનું ઘેલું અને એમાં પણ પોતાની ગાડી લઈને ફરવાનું ઘેલું કેવી રીતે લાગ્યું એની રસપ્રદ વાતો જાણીએ આજે. 
વર્ષોનો વિચાર
તામિલનાડુમાં તમને કોડાઈકેનાલ અને ઊટીની ખબર હશે પણ એરકડ અને એલગિરિનું નામ સાંભળ્યું છે? આ કપલ અત્યારે ત્યાં જ છે. છેલ્લા પંદર દિવસથી તેઓ ફરી રહ્યાં છે. બાય રોડ યાત્રા કેવી રીતે શરૂ થઈ એની વાત કરતાં જગજીવનભાઈ કહે છે, ‘હું ફોટોગ્રાફર છું. હવે જોકે પ્રોફેશનલી રિટાયર્ડ થઈ ગયો છું પરંતુ વિવિધ જગ્યાએ ફોટોગ્રાફિક પ્રોડક્ટ્સનાં એક્ઝિબિશન થતાં હોય ત્યાં અમે હાજરી આપતાં હોઈએ, કારણ કે અમુક પ્રોડક્ટ્સનું અમે પોતે 
પણ મૅન્યુફૅક્ચરિંગ કરીએ છીએ. ૨૦૧૮ની વાત છે. આવી જ રીતે બૅન્ગલોરમાં એક એક્ઝિબિશન હતું, જેમાં અમે હાજરી આપવા જવાનાં હતાં. એ સમયે મને થયું કે ચાલો, આપણે ગાડી લઈને જ જઈએ. જોકે આટલું લાંબું ડિસ્ટન્સ અમે એકલાં જાતે ડ્રાઇવ કરીને જઈએ એ વાતે મારો દીકરો સહમત નહોતો. આવવા-જવાના બે હજાર કિલોમીટર થાય, જે બહુ કહેવાય એમ કહીને તેણે એક વચ્ચેનો રસ્તો દેખાડ્યો. તેના એક મિત્રની ગાડી મુંબઈ હતી, જે ત્યાં જ મોકલવાની હતી. તેણે અમને વનવે ટ્રાવેલ કરીને જવા કહ્યું. ઍટ લીસ્ટ ડિસ્ટન્સ અડધું થઈ ગયું. અમે ઊપડી ગયાં. મારાં વાઇફ દસેક વર્ષ પહેલાં ડ્રાઇવિંગ શીખેલાં. તેણે થોડોક ટાઇમ મને ચલાવવા દો કહીને ડ્રાઇવિંગ શરૂ કર્યું. એ પહેલાં તેણે ૭૫ કિલોમીટર પણ એકધારું ચલાવ્યું નહોતું, પણ એ દિવસે તેણે એકસામટું ૭૫૦ કિલોમીટર ચલાવ્યું. એ જે ડ્રાઇવિંગ તેણે શરૂ કર્યું કે આજ સુધી હવે તે જ ચલાવે છે. તેનો ગાડી પર જે હોલ્ડ છે એ જોઈને પણ મને તાજ્જુબ થાય છે.’
ડબલ ફાયદો
જનરલી આ કપલ પોતાના કામ સાથે જ પ્રવાસને ક્લબ કરી દેતું હોય છે. જગજીવનભાઈ કહે છે, ‘નિયમિત આવાં એક્ઝિબિશિન લાગતાં હોય છે. અમારે એમાં જવાનો પ્લાન એવો હોય કે થોડાં વહેલાં જઈએ અને એક્ઝિબિશન પતાવીને પાછાં પણ થોડાંક મોડાં આવીએ. ચાર દિવસ કામ પતાવીએ અને બાકીના દસ-બાર દિવસ આજુબાજુની ઇન્ટીરિયર જગ્યાઓને એક્સપ્લોર કરીએ. ગુજરાત, રાજસ્થાન, મહારાષ્ટ્ર, હૈદરાબાદ જેવી જગ્યાઓ આ જ રીતે અમે ફરી આવ્યાં છીએ. જ્યારે એકલાં આ રીતે ફરતાં હોઈએ ત્યારે બધી જ જરૂરિયાતની વસ્તુઓ સાથે હોય જ. રસ્તામાં ડ્રાઇવિંગ સીટ પર હંસાને જોઈને ઘણા લોકોને તાજ્જુબ પણ થાય. જોઈને ચહેરા પર સ્માઇલ પણ આવી જ જાય લોકોને. ડ્રાઇવિંગ સીટ પર સિનિયર લેડીને જોઈને ટ્રાફિક-પોલીસ પણ અમને ક્યાંય હેરાન નથી કરતા. મારા અનુભવ પરથી કહું છું કે તમે જ્યારે સેલ્ફ-ડ્રાઇવ સાથે લૉન્ગ ટ્રિપ પર જતા હો તો ગાડીમાં પંક્ચર કિટ, ઍર પ્રેશર પમ્પ, ફ્યુઝ અને બલ્બ હોવા જ જોઈએ. મહારાષ્ટ્રના ઇન્ટીરિયર વિસ્તારના રસ્તાઓ અમને સૌથી ખરાબ મળ્યા છે. એની સામે સાઉથના રસ્તાઓ બેસ્ટ છે.’
સેફ ડ્રાઇવ માટે આ કપલનો નિયમ છે કે સનરાઇઝ પહેલાં હોટેલ પરથી નીકળી જવાનું અને સનસેટ પહેલાં પહોંચી જવાનું. તેઓ રોડ ટ્રિપર્સ ગ્રુપના સભ્ય પણ બની ગયાં છે. મોટા ભાગે રસ્તામાં હોટેલ માટે તેઓ ઍડ્વાન્સ બુકિંગ નથી કરતાં હોતાં પરંતુ એ સિવાયનું ડીટેઇલ્ડ પ્લાનિંગ તેઓ કરીને જ નીકળે. જગજીવનભાઈ કહે છે, ‘એક મહિના પહેલાંથી અમે જ્યાં જવાનાં છીએ ત્યાંની ઝીણી-ઝીણી માહિતી પર રિસર્ચ કરવાનું હું શરૂ કરી દેતો હોઉં છું.’
રસ્તાની મજા
જ્યારે પણ પહાડો પર બાય રોડ નીકળો ત્યારે એમાં સર્પાકાર વળાંકો સામાન્ય બાબત છે. આકરામાં આકરા વળાંકોમાં પણ હંસાબહેન બહુ જ સ્મૂધલી ડ્રાઇવ કરી લે છે. તેઓ કહે છે, ‘એની જ તો મજા છે. એ જ અસલી ઍડ્વેન્ચર છે. આ જ ટ્રિપમાં અમે કોલિ હિલ્સ નામની જગ્યા છે જ્યાં ૨૪ કિલોમીટરના રૂટ પર લગભગ ૭૦ જેટલા વળાંકો છે ત્યાં જઈ આવ્યાં. ઘણા બાઇકર્સનું પણ આ રૂટ પર બાઇક ચલાવવાનું ડ્રીમ હોય છે. ખરેખર, અહીંનો પ્રવાસ ખૂબ જ રોમાંચક રહ્યો. ક્યારેક મૅપના આધારે ખોટો ટર્ન લઈ લેવાય, પરંતુ મારા હસબન્ડનું પેપર પ્લાનિંગ એટલું જોરદાર હોય છે કે બહુ રૅરલી આવી તકલીફો પડે.’

ADVERTISEMENT

અમારું ડ્રીમ

આ કપલની ઇચ્છા છે કે તેઓ નૉર્થ ઈસ્ટ અને લદ્દાખ બાય રોડ જાતે ટ્રાવેલ કરીને જાય. તો સાથે જ એક ઇચ્છા એવી પણ છે કે અમેરિકાના ઈસ્ટ કોસ્ટથી વેસ્ટ કોસ્ટ તેઓ ગાડીમાં જાતે ડ્રાઇવ કરીને જાય. જગજીવનભાઈ કહે છે, ‘વર્ષો પહેલાં અમે આ સપનું જોયું છે. જો કોવિડ ન આવ્યો હોત તો કદાચ એ અત્યાર સુધીમાં પૂરું પણ થઈ ગયું હોત. ’