પાંડે ચાલ્યો દુબઈ પાર્ટ 6
Sheikh Zayed Mosque (PC : Twitter)
દુબઈ પ્રવાસનો મારો આ પાંચમો દિવસ હતો. પરિવારના સભ્યો વહેલા આવી ગયા હોવાથી એમણે અબુ ધાબીની શેખ ઝાયેદ મસ્જિદ અને પ્રેસિડેન્સિયલ પેલેસ આ સ્થળો જોઈ લીધા હતા. આપણા વડા પ્રધાન નરેન્દ્ર મોદી વર્ષ 2015માં અબુ ધાબી આવ્યા હતા. ત્યારે અબુ ધાબીની આ જાણીતી મસ્જિદમાં ગયા હતા. તેથી મને પણ ઉત્સુકતા હતી કે આ મસ્જિદમાં એવું તે શું છે? એકલો જાને રે એ પંક્તિને યર્થાય કરતો હોવ તેમ હું ત્યાં જવા નિકળી પડ્યો. અમારી બિલ્ડિંગના નેપાળી વોચમેને મને ત્યાં બસમાં કઈ રીતે જવાય એની માહિતી આપી હતી. અબુ ધાબીમાં સિટી બસ સર્વિસ બહુ જ સારી છે. આપણે ત્યાંની બીઆરટીએસની બસની જેમ એમાં કોઈ કન્ડકટર નથી હોતો. બસમાં જાવ ત્યારે તમારે કાર્ડ પંચ કરવાનું અને ઉતરો ત્યારે પંચ કરવાનું. ગમે ત્યાં જાવ માત્ર બે જ દિરહામની ટિકિટ હતી.
સિક્યોરીટીએ રોક્યો
આમ તો અજાણી જગ્યાએ જાવ તો મે કર્યું એવું દુસાહસ કરવું ન જોઈએ. ખાસ કરીને પરિવાર સાથે હોય ત્યારે તો ખાસ. નહીંતર ગાળ ખાવી પડે. કારણ કે મને નેપાળી સિક્યોરીટીવાળાએ બસ નંબર તો બરાબર જ કહ્યો હતો. પરંતુ તે બસે બહુ જ દૂર ઉતાર્યો. સવારના 11 વાગ્યા હતા પરંતુ અમદાવાદમાં મે મહિનામાં પડતો હોય એના કરતા પણ વધારે ગરમી મને લાગતી હતી. મસ્જિદની એક ગેટમાંથી પ્રવેશ કરવાનો પ્રયત્ન કર્યો તો એક આર્મીનો જવાન મશીનગન સાથે સિક્યોરીટી ગેટમાંથી બહાર કુદયો. હું તો ડરી જ ગયો પરંતુ એણે કહ્યું સલામ વાલેકુમ.. મે પણ જવાબમાં વાલેકુંમ કહ્યું પછી એને પૂછ્યું વેર ઇસ ધ ટુરીસ્ટ ગેટ. એણે મને દુરનો ગેટ બતાવ્યો. હું એ દિશા તરફ આગળ વધ્યો. રસ્તામાં વિચાર પણ આવતો હતો કે પાછો વળી જાવ. પરંતુ ધીમે-ધીમે આગળ વધતો રહ્યો. આખરે મેઇન ટુરીસ્ટ ગેટ પર પહોંચ્યો.
શોર્ટ અને સ્કર્ટ પહેરો તો નહિ ચાલે
એક પ્રવાસી તરીકે મસ્જિદમાં જવાનો બહુ અનુભવ નથી. અહીં પુરૂષ તેમજ સ્ત્રીઓને પરંપરાગત વસ્ત્રો પહેરવા જરૂરી છે. પુરૂષોને શોર્ટ તેમજ મહિલાઓને સ્કર્ટ સાથે પ્રવેશ નથી. જો કે પ્રવાસીઓ પાસે એવા વસ્ત્રો ન હોય તો એમને અહીં વસ્ત્રો આપવામાં પણ આવે છે. ઘણી વિદેશી મહિલાઓ પહેલી વખત બુરખો પહેરવાનો કારણે ખુશ જણાતી હતી. હું તો પેન્ટ શર્ટમાં હતો તેથી વાંધો ન આવ્યો. મસ્જિદમાં જતા પહેલા અંદાજે અડધો કિલોમીટર ચાલવાનું હતું. પરંતુ એરપોર્ટ પર હોય એવા એસ્કેલેટર અહીં હતા. બહાર તડકામાં રખડવાને કારણે થાક લાગ્યો હતો તેથી હું શાંતિથી એના પર ઉભો રહ્યો. પગથિયા ધીરે-ધીરે સરકતા હતા.
મફતમાં ઇ-ગાઇડ
એસ્કેલેટરમાંથી બહાર આવતા જ મસ્જિદની ભવ્યતાનો અંદાજ આવી જાય. પ્રવાસીઓની માહિતી માટે ઇ-ગાઇડની વ્યવસ્થા પણ છે. જેમાં મસ્જિદના નિર્માણથી માંડીને આર્કિટેક્ચર વિશેની માહિતી આપવામાં આવતી હતી. વળી એનો કોઈ ચાર્જ પણ નહોતો. માત્ર તમારે તમારા દેશનું કોઈ આઇડી કાર્ડ ડિપોઝીટ તરીકે આપવાનું હોય છે. મે વળી ઇંગ્લિશને બદલે ઉર્દુ ઇ-ગાઇડ લીધું પણ ઉર્દુ નંબર ખબર ન હોવાને કારણે ગડબડ થઈ ગઈ. લગભગ દોઢેક કલાક જેટલો સમય પસાર થઈ ગયો.
શાનદાર બસ સર્વિસ
મસ્જિદની બહાર જ બસ સ્ટોપ હતું. અહીંથી જ મને મારા ઘર તરફ જવાની બસ મળશે એવી પાકી ખાતરી કરવા ફરી પાછો મસ્જિદની અંદર આવેલા હેલ્પડેસ્કને પૂછીને આવ્યો. કારણ કે બસ સ્ટોપ પર હું અને કોઈ કોરિયાથી આવેલી યુવતી એમ બે જણ જ હતા. બસ પણ તરત જ આવી. ડ્રાઇવરને મે એક બસ સ્ટોપ આવે તો મને જણાવજો એવી વિનંતી કરી. પરંતુ થાકને કારણે ક્યારે ઉંધ આવી ગઈ ખબર જ ન પડી. બસમાં ડ્રાઇવરે બે ત્રણ વખત એનાઉન્સમેન્ટ કરતા અચાનક ઝબકીને જાગ્યો. તેમજ ફટાફટ નીચે ઉતર્યો. બહારના મુસાફરોની આટલી તસ્દી લેનાર ડ્રાઇવર પ્રત્યે માન ઉપજ્યું. મેઇન બસ સ્ટોપમાં જઈને મે પ્રિન્સેસ પેલેસ કઈ બસ જશે એની માહિતી મેળવી. ત્યાર બાદ મારા ઘર તરફ જતી બીજી બસમાં બેસીને પાછો ફર્યો.
એક એવો પેલેસ કે જે પેલેસ કરતા પણ ભવ્યથી પણ ભવ્ય લાગે
બપોરે થાકીને સૂઇ ગયો તો સાંજ થઈ ગઈ હતી. પ્રેસિડેન્સિયલ પેલેસ જોવા માટે વધુ સમય ન હતો. પરંતુ તેમ છતાં હું તુરંત ત્યાં જવા માટે નીકળ્યો. ટિકીટ માંગી તો ટિકિટ આપનાર મહિલાએ સલાહ આપી કે માત્ર અડધો કલાકમાં મહેલ બંધ થઈ જશે. મારી પાસે બીજો વિકલ્પ નહોતો. તેથી મે 60 દિરહામની ટિકિટ લીધી. એક બસ અમને મહેલની નજીક લઈ ગઈ. પ્રેસિડેન્સિયલ પેલેસ કેમ કહે છે એ સમજાયુ નહોતું. કારણ કે અહીં કોઈ પ્રેસિડેન્ટનું નિવાસ સ્થાન નહોતું. પરંતુ સમગ્ર યુએઇનો વહિવટ અહીંથી ચાલે છે. યુએઇ કેબિનેટની મીટીંગ અહીં થાય છે. વળી કોઈ મહાનુભાવ યુએઇમાં આવે ત્યારે પણ એમને અહીં જ લાવવામાં આવે છે. આમ કોઈ રાજાનો મહેલ ન હોવા છતાં એ મહેલ કરતા પણ વધારે ભવ્ય છે. એનો હોલ, ડાઇનીંગ તેમજ લાયબ્રેરી જોવાનું કામ મે ઝડપથી પૂર્ણ કર્યુ. થોડાક જ વખતમાં અમને સિક્યોરીટીના માણસોએ પેલેસ બંધ થવાનો હોવાથી બહાર જવાની વિનંતી કરી.
લાઇટ એન્ડ સાઉન્ડ શો UAE નો ઇતિહાસ બતાવશે
મારા મતે જો તમારે શાંતીથી પેલેસની ભવ્યતાને જોવી હોય તો દોઢેક કલાકનો સમય હોવો જોઈએ. પરંતુ મારે બહુ અફસોસ કરવાનો એટલા માટે ન થયું કે અહીં સાંજે 7.45 વાગે લાઇટ એન્ડ સાઉન્ડ શો નું આયોજન કરવામાં આવતું હોય છે. થોડાક જ સમયમાં બધી પેલેસની લાઇટ બંધ થઈ અને શો શરૂ થતાં જ જાણે પેલેસ જાણે જીવંત બની ગયો હતો. લાઇટની માધ્યમથી કઈ રીતે એક તંબુમાં સાત અલગ-અલગ શેખોએ ભેગા થઈને ચર્ચા કરી અને યુએઇ અસ્તિત્વમાં આવ્યું. એની વાત સુંદર રીતે દર્શાવાઈ હતી. આમ તમે પણ જો આ પેલેસ જોવા આવો તો આ શો પણ જોઈ શકાય એ રીતે જ આવજો. શો પુરો થતાં જ બસ પકડીને ઘર તરફ જવા હું નીકળ્યો.
સ્પેનના કાંદા 170rs કિલો
પ્રેસિડેન્સિયલ પેલેસથી મારા સાઢુભાઈનું ઘર નજીક હતું. માત્ર 20 મિનિટમાં ઘરે પહોંચયા બાદ મોલમાં ગ્રોસરી ખરીદવા માટે ફરી બહાર નીકળ્યો. ત્યાંના મોલમાં અલગ-અલગ દેશના સામાન મળતો હતો. અહીં માત્ર કાકડી જ થાય છે તેથી મોટા ભાગની વસ્તુઓ બહારથી જ મંગાવે છે. યુએઇના ભારતીયો માનીતો લુલુ હાઇપર માર્કેટમાંથી જ વસ્તુઓ ખરીદે છે. પરંતુ નજીકમાં સિપ્નીસ નામનો સ્ટોર હતો. તેથી અમે ત્યાં ગયા. આપણે ત્યાં કાંદા હંમેશા ન્યુઝમાં રહે છે. હાલ તો કાંદાના ભાવ રૂ. 150 કિલોથી પણ વધું પહોંચી ગયો. પરંતુ સ્પેનથી આવેલા કાંદાનો ભાવ કિલોના 8.5 દિરહામ એટલે કે રૂ 170 હતો. આપણા કરતા મોટા કદના ચીનના આદુ, વિવિધ દેશોના ટામેટાં તથા કેન્યાની કેરીઓ પણ ત્યાં જોવા મળી હતી.
આવતા સપ્તાહની વાત
દુબઈ રણ પ્રદેશ છે. અહીં પાણી અને પેટ્રોલ બન્નેની કિંમત એક સરખી તેમ છતાં અહીં 72,000 સ્કેવર મીટરમાં ફેલાયેલો વિશ્વનો સૌથી મોટો ફુલોનો બગીચો છે. છે ને ચમત્કાર. આવા મિરેકલ ગાર્ડન તેમજ ડેઝર્ટ સફારીની મુલાકાતે તમને પાંડે લઈ જશે. જેમાં કરજો ઉંટ પર સવારી અને માણો બેલે ડાન્સ