ઘરને સ્ટાઇલિશ બનાવવાની સાથે નૅચરલ લાઇટને રંગીન ઇફેક્ટમાં ફેરવતા સનકૅચર્સ ઝડપથી લોકપ્રિય બની રહ્યા છે. જાણો ગ્લાસ, ક્રિસ્ટલ અને મૅક્રેમે ડિઝાઇનવાળા આ ડેકોર ટ્રેન્ડ વિશે.
ઘરમાં પ્રકાશ, રંગ અને સકારાત્મકતા લાવશે સનકૅચર્સ
છેલ્લા થોડા સમયથી હોમ ડેકોરમાં એવી વસ્તુઓનો ક્રેઝ વધ્યો છે જે દેખાવમાં સ્ટાઇલિશ હોય અને સાથે જ ઘરમાં નૅચરલ ઉજાસ પણ લાવે. સનકૅચર્સ આ કૅટેગરીમાં અત્યારે ટૉપ પર છે. બારી કે બાલ્કનીમાં એને લટકાવતાંની સાથે જ આખા રૂમમાં મસ્ત રંગબેરંગી લાઇટિંગ ઇફેક્ટ જોવા મળે છે. આજકાલ માર્કેટમાં ગ્લાસ, ક્રિસ્ટલ, મેટલ અને મૅક્રેમે વર્કવાળાં સનકૅચર્સની ડિમાન્ડ વધી ગઈ છે
આજના સમયમાં હોમ ડેકોર માત્ર ઘરને સુંદર દેખાડવા પૂરતું સીમિત નથી રહ્યું. લોકો હવે એવી વસ્તુઓ પસંદ કરી રહ્યા છે જે ઘરમાં શાંતિ, પૉઝિટિવ એનર્જી અને કુદરતી તત્ત્વોની અનુભૂતિ પણ લાવે. આ જ કારણ છે કે સનકૅચર્સ ફરીથી હોમ ડેકોરની દુનિયામાં લોકપ્રિય ટ્રેન્ડ બની રહ્યાં છે.
બારી, બાલ્કની, લિવિંગરૂમ કે વર્કસ્પેસમાં લગાવેલા સનકૅચર પર જ્યારે સૂર્યપ્રકાશ પડે છે ત્યારે એ રંગબેરંગી પ્રકાશ ફેલાવે છે, જે ઘરને વધુ સુંદર અને આકર્ષક બનાવે છે. સૂર્યનાં કિરણો જ્યારે કાચ, ક્રિસ્ટલ અથવા રંગીન બીડ્સમાંથી પસાર થાય છે ત્યારે દીવાલો અને ફ્લોર પર રંગીન પ્રકાશની પૅટર્ન દેખાય છે. આ દૃશ્ય માત્ર સુંદર જ નથી લાગતું; ઘરમાં હળવાશ, ખુશી અને તાજગીની અનુભૂતિ પણ કરાવે છે.
હાલમાં સનકૅચર્સ માટે લોકોની પસંદગીમાં ઘણો ફેરફાર જોવા મળે છે. પહેલાં એ માત્ર બારીઓમાં લગાડાતી સજાવટ તરીકે જોવામાં આવતાં હતાં, જ્યારે હવે એ ઇન્ટીરિયર ડિઝાઇનનો મહત્ત્વપૂર્ણ ભાગ બની ગયાં છે. ખાસ કરીને મિનિમલ, બોહો અને નૅચરલ થીમવાળાં ઘરોમાં સનકૅચર્સ ખૂબ જ સરસ રીતે ફિટ થાય છે.
કાચનાં સનકૅચર્સ સૌથી વધુ લોકપ્રિય છે, કારણ કે એ પ્રકાશને સુંદર રીતે પરાવર્તિત કરે છે. રંગીન સ્ટેઇન્ડ ગ્લાસવાળાં સનકૅચર્સ ઘરમાં આર્ટિસ્ટિક લુક આપે છે અને બારી પાસે લગાડવામાં આવે ત્યારે ખૂબ જ આકર્ષક લાગે છે.
ADVERTISEMENT
ક્રિસ્ટલ સનકૅચર્સ ખાસ કરીને એમની ઝગમગાટ માટે પસંદ કરવામાં આવે છે. પારદર્શક અથવા કટ-ગ્લાસ ક્રિસ્ટલ સૂર્યપ્રકાશને અનેક નાનાં ઇન્દ્રધનુષી કિરણોમાં ફેરવી દે છે. ફેન્ગ શૂઇ અને વાસ્તુમાં પણ ક્રિસ્ટલને સકારાત્મક ઊર્જા સાથે જોડવામાં આવે છે એટલે ઘણા લોકો એને ઘરમાં શાંતિ અને સમૃદ્ધિ માટે લગાવે છે.
મેટલ સનકૅચર્સ આધુનિક અને એલિગન્ટ લુક માટે જાણીતાં છે. ગોલ્ડ, બ્રાસ, કૉપર અથવા બ્લૅક મેટલ ફ્રેમમાં બનેલાં સનકૅચર્સ આજકાલ મિનિમલ અને કન્ટેમ્પરરી ઇન્ટીરિયર સાથે ખૂબ જ સારાં લાગે છે. ખાસ કરીને સન, મૂન, સ્ટાર અથવા જ્યોમેટ્રિક આકારવાળાં મેટલ સનકૅચર્સ ટ્રેન્ડમાં છે.
મૅક્રેમે સનકૅચર્સ બોહો અને નૅચરલ ડેકોરપ્રેમીઓમાં ખૂબ લોકપ્રિય છે. કૉટન દોરાથી હાથથી બનાવેલાં આ સનકૅચર્સ ઘરમાં સાદગી સાથે સુંદરતા ઉમેરે છે. એમાં નાનાં ક્રિસ્ટલ, બીડ્સ અથવા મિરર જોડવામાં આવે તો એ વધુ આકર્ષક લાગે છે.
રંગીન બીડ્સવાળા સનકૅચર્સ પણ આજે ખાસ ડિમાન્ડમાં છે. નાના રંગીન મણકા, કાચના બીડ્સ અને ચમકદાર પથ્થરો મળીને બનેલાં આ સનકૅચર્સ સૂર્યપ્રકાશ પડતાં જ આખા રૂમના વાતાવરણને એકદમ જીવંત અને આહલાદક બનાવી દે છે. બાળકોના રૂમ, બાલ્કની અથવા ક્રીએટિવ સ્પેસ માટે આ પ્રકારનાં સનકૅચર્સ ખાસ પસંદ કરવામાં આવે છે.
આ ઉપરાંત ફ્લોરલ, બટરફ્લાય, મંડલા, ચંદ્ર-તારા અને નૅચરલ શેપવાળાં સનકૅચર્સ પણ ટ્રેન્ડમાં છે. લોકો હવે પોતાના ઘરની થીમ, રંગો અને એનર્જી અનુસાર સનકૅચર પસંદ કરે છે. ઘણા લોકો એને ડૂ-ઇટ-યૉરસેલ્ફ (DIY) પ્રોજેક્ટ તરીકે પણ બનાવી રહ્યા છે, જેને કારણે હૅન્ડમેડ અને પર્સનલાઇઝ્ડ સનકૅચર્સની ડિમાન્ડ વધી રહી છે.
સનકૅચર્સની ખાસિયત એ છે કે એ ઘરમાં બહુ જગ્યા લીધા વગર મોટો ફેરફાર લાવી શકે છે. એ પ્રકાશને વધુ જીવંત બનાવે છે, રૂમમાં રંગોની રમત સર્જે છે અને રોજિંદા જીવનમાં નાનકડું સૌંદર્ય ઉમેરે છે.
