જન્મનો ગ્રહ શુક્ર દૂષિત હોય ત્યારે જ આવું બનતું હોય છે. દૂષિત શુક્ર તમને તમામ પ્રકારનું ઐશ્વર્ય આપવાનું કામ કરે તો પણ એ સતત દેવું ઊભું કર્યા કરે અને સાથોસાથ એ ઐશ્વર્ય માણવાની ક્ષણ પણ ન આપે.
પ્રતીકાત્મક તસવીર
રાજા એ જે સુખ-સમૃદ્ધિ અને સાહ્યબી વચ્ચે રહેતો હોય અને આ જ કારણે શુક્ર એટલે કે વીનસને કુંડળીનો રાજા કહેવામાં આવે છે. શુક્ર એક એવો રાજા છે જે સુખ-સાહ્યબી અને સંપત્તિ તો આપે જ છે, સાથોસાથ ફિઝિકલ રિલેશનની બાબતમાં પણ ઐશ્વર્ય આપવાનું કામ કરે છે. જન્મકુંડળીમાં જેનો શુક્ર નબળો તે આ બધી બાબતોમાં હંમેશાં દુઃખી રહે છે. સત્તાસ્થાન પર પહોંચવા માટે જેમ સૂર્યનું પ્રબળ હોવું અનિવાર્ય છે એવી જ રીતે સત્તા મેળવ્યા પછી પૉપ્યુલરિટી પણ મળે એ માટે શુક્ર ગ્રહનું મજબૂત હોવું બહુ જરૂરી છે. કહેવાનો ભાવાર્થ એ કે શુક્ર એક એવો ગ્રહ છે જેની ગરીબને સૌથી વધુ આવશ્યકતા છે તો શ્રીમંતને પોતાની શ્રીમંતાઈ અકબંધ રાખવા માટે એની અનિવાર્યતા રહે છે. જોકે ઘણી વખત એવું પણ જોવા મળે કે દેખીતી રીતે શ્રીમંતાઈ હોય અને પછી પણ વ્યાજનાં ચક્કરો ચાલતાં હોય, લેણિયાતોનો રાફડો ફાટ્યો હોય અને સંસારમાં રહેલી સુખ-સાહ્યબીનો આનંદ લઈ શકાતો ન હોય. એવા સમયે માનવું, ધારવું કે શુક્ર દૂષિત છે.
દૂષિત શુક્રને ફરીથી સક્ષમ બનાવવા અને દેવાંમાંથી બહાર નીકળવાના બહુ સરળ રસ્તાઓ છે. જોકે એનો નિયમિત અમલ થતો રહેવો જોઈએ. દૂષિત શુક્રને સક્ષમ બનાવવાના કેટલાક ઉપાયો જાણવા જેવા છે.
ADVERTISEMENT
જીવંત લક્ષ્મીનો કરો આદર
વાઇફ અને ગર્લફ્રેન્ડથી લઈને ઘરમાં જો મા-બહેન કે દીકરી હોય તો તેમનો પૂરો આદર-સત્કાર કરો, કારણ કે શુક્રનું વાહક મા લક્ષ્મી છે. ગૃહલક્ષ્મી નારાજ હોય ત્યાં ક્યારેય લક્ષ્મીનો કાયમી વાસ નથી રહેતો, પણ જન્મનો શુક્ર સારો હોવાથી એણે એ ઘરમાં રહેવું પડે છે. જોકે એ રહે છે રિસાયેલી હાલતમાં અને રિસાયેલી હાલતમાં રહેલી લક્ષ્મી હંમેશાં દેવું ઊભું કરવાનું કામ કરે છે. સ્ત્રીદાક્ષિણ્ય જાળવો અને તેમનું સન્માન કરો. દિવસમાં એક વખત ઉપર કહ્યાં એ મહિલા પાત્રોને ખુશ કરવાના પ્રયાસ પણ અપ્રતિમ પરિણામ આપવાને સમર્થ છે. એક અગત્યની વાત. પ્રયાસ કરવો જોઈએ કે ઘરમાં રહેલી મહિલાઓ ઘરમાં પણ ક્યારેય ઉઘાડા પગે ન ચાલે. તેના પગમાં હંમેશાં ચંપલ કે ઘરમાં પહેરવાનાં સ્લિપર હોવાં જ જોઈએ. જો એની આદત ન હોય તો એ આદત બનાવવાની કોશિશ કરો.
રહો શ્વેત રંગની સાથે
અગાઉ અનેક વાર કહ્યું છે એમ સફેદ રંગ શુક્રનો પ્રતિનિધિ છે. દૂષિત શુક્રને સક્ષમ બનાવવા માટે દિવસ દરમ્યાન મહત્તમ રીતે શ્વેત કલરની સાથે રહો અને એની શરૂઆત દિવસના આરંભથી જ કરો. સવારની શરૂઆત બ્રશથી કરીએ છીએ એટલે શક્ય હોય તો વાઇટ બ્રશ અને વાઇટ ટૂથપેસ્ટનો ઉપયોગ કરવો હિતાવહ છે.
આ ઉપરાંત જમવામાં પણ સૌથી પહેલાં વાઇટ આઇટમ આરોગવાનું રાખો. મીઠાઈ હોય તો ઉત્તમ, પણ ધારો કે એ ન ખાઈ શકાય તો ચપટી રાંધેલો ભાત કે એક કણી ખાંડની ખાઈને પણ જમવાનું શરૂ કરી શકાય.
શુક્રને સફેદ રંગના ફૂલના અત્તર સાથે સીધો સંબંધ છે. મોગરાનું જો અત્તર વાપરવાનું શરૂ કરો તો બેસ્ટ. અન્યથા વાઇટ ઑર્કિડ કે ગુલાબનું અત્તર પણ વાપરી શકાય. જોકે સફેદ ઑર્કિડ કે ગુલાબમાંથી જ અત્તર લેવામાં આવ્યું છે કે નહીં એની ખાતરી ન હોવાથી શક્ય હોય તો મોગરાના ફૂલનો ઉપયોગ વધારે હિતાવહ છે. મોગરાનું એક ફૂલ ખિસ્સામાં રાખવું અને એ ખિસ્સામાં સાથે રૂમાલ પણ રાખવો જેથી ફૂલ પોતાની ખુશ્બૂ એ રૂમાલને આપતો રહે. દિવસ દરમ્યાન આ રૂમાલથી ચહેરો સાફ કરતા રહેવાથી શુક્રની દૂષિત અસર ઓસરે છે અને ચહેરા પર પ્રસન્નતા પણ આવશે. શુક્ર દૂષિત હોય એવા સમયે શરીરસુખમાં પણ ઓટ આવે છે. ઉપર મુજબનો ઇલાજ અમલમાં મૂકવાથી જીવનમાં વિજાતીય આકર્ષણ દાખલ થાય કે પછી શરીરસુખ આપનારા સાથી સાથે મનદુઃખ ચાલતું હોય તો એ દૂર થાય.
ગ્રૂમિંગ છે મસ્ટ
નવાઈ ભલે લાગે, પણ આ હકીકત છે. અસ્તવ્યસ્ત રહેવું શુક્રને બિલકુલ પસંદ નથી. એવા દીદાર કેતુ અને અમુક અંશે રાહુને આવકારે છે. સુઘડ અને સુંદર રહેનારા લોકો શુક્રના ફેવરિટ છે એટલે જો શુક્રને શુભકારક બનાવવો હોય તો ગ્રૂમિંગને નિયમિત બનાવો અને સારામાં સારું પરફ્યુમ વાપરવાનું અને કપડાં પહેરવાનું રાખો. જો બિઅર્ડ રાખતા હો તો એ પણ નિયમિત સેટ કરાવો, જેથી તમે સાધુ નહીં પણ સ્ટાઇલિશ દેખાઓ.
