Friendship Day: દરેકે પોતાના દોસ્ત સાથે જોવા જેવી બૉલીવુડની શ્રેષ્ઠ ફિલ્મ્સ

દોસ્તી (1964)

1964માં આવેલી આ બ્લેક એન્ડ વ્હાઈટ ફિલ્મની આજે પણ ચર્ચા થાય છે. જેમાં રામૂ અને મોહનની દોસ્તી દેખાડવામાં આવી છે. બન્ને દિવ્યાંગ છે પણ દોસ્તી થયા બાદ તેઓ તેમની ક્ષમતાને ઓળખે છે અને સાથે મળીને ગીત ગાઈને જીવન વિતાવે છે. ફિલ્મમાં એકબીજાનો ત્યાગ દર્શાવવામાં આવ્યો છે.

આનંદ (1971)

આ ફિલ્મ અમિતાભ બચ્ચન અને રાજેશ ખન્નાની દોસ્તી પર આધારિત છે. જેમાં રાજેશ ખન્ના મરતા મરતા પણ અમિતાભને જીવન જીવતા શીખવાડે છે. બહુ ઓછા સમયની દોસ્તીમાં પણ ફિલ્મમાં જીવન અને દોસ્તીનું મહત્વ સમજાવવામાં આવ્યું છે.

હાથી મેરે સાથી (1971)

રાજેશ ખન્નાની આ ફિલ્મની વિશેષતા એ છે કે, આ ફિલ્મમાં મનુષ્ય સાથેની નહીં પણ જાનવરો સાથેની દોસ્તી દર્શાવવામાં આવી છે. રાજૂને ચાર હાથીઓ પર માણસો કરતા પણ વધુ પ્રેમ હતો અને હાથી પણ દોસ્તી બહુ સારી રીતે નિભાવતા હતાં. 

ઝંઝીર (1973)

ફિલ્મના ગીતની પંક્તિઓ 'યારી હૈ ઈમાન મેરા યાર મેરી જિંદગી' એ ત્યાગ દર્શાવે છે જે એક મિત્ર જ દોસ્તી અને દોસ્ત માટે કરી શકે. અમિતાભ બચ્ચન અને પ્રાણે આ ફિલ્મમાં બહુ ઉત્તમ અભિનય કર્યો છે.

નમક હરામ (1973)

ગરીબ અને અમીર વચ્ચે ભેદ ન રાખવાનો સંદેશ આપતી આ ફિલ્મ સંદેશ આપે છે કે, પરિસ્થિતિ કેવી પણ હોય મિત્રનો સાથ ક્યારેય ન છોડવો જોઈએ.

શોલે (1975)

દોસ્તી પર આધારિત હિન્દી ફિલ્મોમાંની શ્રેષ્ઠ ફિલ્મ એટલે અમિતાભ બચ્ચન અને ધર્મેન્દ્રની 'શોલે'. જય અને વીરુની દોસ્તી સદીઓ સુધી યાદ રાખવામાં આવશે.

દોસ્તાના (1980)

દોસ્તી પર બનેલી શ્રેષ્ઠ ફિલ્મોમાંની એક એટલે આ ફિલ્મ. આ ફિલ્મ એક્શન ફિલ્મ છે. જેમાં અમિતાભ બચ્ચન, શત્રુઘ્ન સિંહા, ઝીનત અઆન, પ્રેમ ચોપડા, અમરીશ પુરી, હેલન અને પ્રાણ છે.

યારાના (1981)

આ ફિલ્મમાં બિશન તેના બાળપણના મિત્ર કિશનને ગાયક બનવામાં મદ કરે છે અને કિશન આ ઉપકારના બદલામાં મિત્રને મુશ્કેલીમાંથી બચાવે છે. ફિલ્મનું ગીત 'તેરે જૈસા યાર કહાં...' આજે પણ એટલું જ લોકપ્રિય છે.

જો જીતા વહી સિકંદર (1992)

દોસ્તી પર આધારિત આમિર ખાનની આ ફિલ્મને શ્રેષ્ઠ ફિલ્મોમાંની એક ફિલ્મ કહેવામાં આવે છે. આ ફિલ્મ દોસ્તી અને ત્યાગનો સંદેશ આપે છે.

અંદાઝ અપના અપના (1994)

અમર અને પ્રેમની દોસ્તીના લોકો આજે પણ દીવાના છે. આ કૉમેડી ફિલ્મમાં બે મિત્રો અમર અને પ્રેમ પોતાનો પ્રેમ પામવા માટે એકબીજાને મદદ કરે છે.

રૉક ફોર્ડ (1999)

આ ફિલ્મમાં ટીચર અને સ્ટુડન્ટની દોસ્તી દેખાડવામાં આવી છે અને સમજાવ્યું છે કે, દોસ્તીને ઉંમર નથી નડતી. ફિલ્મનું ગીત 'યારો દોસ્તી બડી હસીં હૈ' બહુ લોકપ્રિય થયું હતું.

દિલ ચાહતા હૈ (2001)

આ ફિલ્મ મિત્રોના સપનાઓની સાથે તેમના આંતરિક વિવાદો પણ દર્શાવે છે. પોતાના વિચારોને બાજુએ મુકીને પણ મિત્રોનો દ્રષ્ટિકોણ સમજવાનો પ્રયત્ન કરે છે.

મુન્ના ભાઈ એમ.બી.બી.એસ. (2003)

આ ફિલ્મમાં સર્કિટ અને મુન્નાની દોસ્તી દર્શાવવામાં આવી છે. સર્કિટ દરેક સુખ-દુ:ખમાં પોતાના મિત્ર મુન્ના સાથે ઉભો રહે છે. સમય અને સ્થિતિ સાથે સંઘષ કરતા મુન્ના અને સર્કિટ લોકોને અનેક સંદેશો આપે છે.

કોઈ મિલ ગયા (2003)

આ ફિલ્મ બીજી દુનિયામાંથી આવેલા એલિયન સાથેની દોસ્તી બહુ સરસ રીતે સમજાવે છે. સાથે જ એક એવો છોકરો પણ દોસ્તીનું મહત્વ સમજે છે જેની ઉંમર તો વધી રહી છે પણ દિમાગ નહીં, તે પણ ફિલ્મમાં દેખાડવામાં આવ્યું છે.

રંગ દે બસંતી (2006)

રાકેશ ઓમપ્રકાશ મહેરાની આ ફિલ્મમાં દેશપ્રેમ અને દોસ્તીની વાત છે. આ ફિલ્મની દોસ્તીની વ્યાખ્યા કંઈક જુદી રીતે સમજાવે છે. ફિલ્મ દોસ્તીના મહત્વને અન્ડરલાઈન કરે છે. ફિલ્મ દર્શાવે છે કે, જીવનમાં પોતાની સાથે વાત કરવી, પોતાના સપનાઓ સાથે વાતચીત કરવી અને મિત્રો સાથે વાત કરવી કેટલી જરૂરી છે. દિલ્હી યુનિવર્સિટીના પાંચ વિદ્યાર્થીઓ તેમની સામાજિક જવાબદારી કેવી રીતે નિભાવે છે તે વિષય પર કેન્દ્રિત કરવામાં આવ્યું છે. જુદા જુદા સામાજિક અને આર્થિક વર્ગમાંથી આવતા આ મિત્રો એક સ્વપ્ન સાથે આગળ આવે છે અને એક ટીમ બનાવે છે પછી તે સપનાને પરિપૂર્ણ કરે છે.

રૉક ઑન (2008)

ચાર દોસ્તોની આ વાર્તામાં પ્યાર, તકરાર બધુ જ છે. એક બેન્ડ બનાવવા માટે ચારેય મિત્રો નોકરી અને કામમાંથી સમય કાઢીને મ્યૂઝિકને જ જિંદગી બનાવે છે. પરંતુ પરિવાર અને ગેરસમજને લીધે જુદા થઈ જાય છે. પણ મિત્રોનો સાથ જ તેમને જિંદગીની પેશન સાથે મુલાકાત કરાવે છે.

જાને તૂ યા જાને ના (2008)

આ વાર્તા કોલેજના પાંચ મિત્રોની છે. દોસ્તી ક્યારે પ્રેમમાં બદલાઈ જાય છે તે ખબર જ નથી પડતી.

થ્રી ઈડિયટ્સ (2009)

આ ફિલ્મની વાર્તા મિત્રતા અને વિચારધારા પરિવર્તનની છે. આ ફિલ્મમાં ત્રણ મિત્રો છે અને ત્રણેય વિવિધ પ્રકારની માનસિકતા રજૂ કરે છે. તેમની વિચારધારાને શિક્ષણ અને રોજગાર સાથે જોડવામાં આવી છે.

જિંદગી ના મિલેગી દોબારા (2011)

આ ફિલ્મમાં દોસ્તીની વ્યાક્યા કંઈક જુદી છે. ફિલ્મમાં દર્શાવવામાં આવ્યું છે કે, જીવનમાં પોતાની સાથે વાત કરવી, પોતાના સપનાઓ સાથે વાત કરવી અને મિત્રો સાથે વાત કરવી કેટલી જરૂરી છે.

કાઈ પો છે (2013)

આ ફિલ્મમાં દોસ્તના સપનાઓની સાથે જ તેમના તકરારની પણ વાર્તા છે. પરંતુ તેમની તકરારો ક્યારેય એટલી મોટી નથી થતી કે તેમની દોસ્તી પર અસર થાય. અહીં ત્રણેય મિત્રો જુદી જુદી વિચારધારા વાળા છે. ફિલ્મમાં સુશાંત સિંહ રાજપૂત, રાજકુમાર રાવ અને અમિત સાધ મુખ્ય ભૂમિકામાં છે.