Bollywood Glimpses: કોને છે વેરીકોઝ વેઇન્સ, કોણ છે પડોશણના પ્રેમમાં? જુઓ તસવીરો

ફ્લેક્સિબિલિટીને મહત્ત્વ આપે છે રકુલ

મુંબઈ : રકુલ પ્રીત સિંહ ફ્લેક્સિબિલિટી પર ભાર મૂકે છે. રકુલે યોગ કરતો ફોટો શૅર કર્યો છે. આ ફોટો તેના મૉલદીવ્ઝના વેકેશનનો છે. તેનું યોગનું પૉશ્ચર ખરેખર પ્રશંસનીય છે. ફોટો પરથી ખ્યાલ આવી જાય છે કે તે યોગને લાઇફમાં ખૂબ મહત્ત્વ આપે છે. આ ફોટોને ઇન્સ્ટાગ્રામ પર શૅર કરીને રકુલે કૅપ્શન આપી હતી કે સ્થિરતા માટે ફ્લેક્સિબિલિટી ખૂબ જરૂરી છે.

સીમા પાહવાની ડિરેક્ટોરિયલ ડેબ્યુ ફિલ્મ રામપ્રસાદ કી તેહરવી ૧ જાન્યુઆરીએ થશે રિલીઝ

મુંબઈ : (આઇ.એ.એન.એસ.) સીમા પાહવાની ડિરેક્ટર તરીકેની પહેલી ફિલ્મ ‘રામપ્રસાદ કી તેહરવી’ ૨૦૨૧ની ૧ જાન્યુઆરીએ રિલીઝ થવાની છે. આ ફિલ્મમાં ભાર્ગવ પરિવારની સ્ટોરી દેખાડવામાં આવશે, જેમાં પરિવારના વરિષ્ઠ સદસ્યનું નિધન થાય છે અને તેની અંતિમ વિધિ માટે આખું કુટુંબ એકઠું થાય છે. આ ફિલ્મમાં નસીરુદ્દીન શાહ, સુપ્રિયા પાઠક, કોંકણા સેન શર્મા, પરમબ્રતા ચેટરજી, વિનય પાઠક, વિક્રાન્ત મૅસી અને મનોજ પાહવા પણ જોવા મળશે. આ ફિલ્મ વિશે સીમાએ કહ્યું હતું કે ‘હું ખુશ છું કે મારી પહેલી ફિલ્મ ૨૦૨૧માં ભારતમાં પહેલી રિલીઝ થનારી ફિલ્મ બનશે. એની સ્ટોરી મારા પોતાના પર્સનલ અનુભવથી પ્રેરિત છે. ઘણાં વર્ષો પહેલાં જ મારા પિતાનું નિધન થયું હતું. એ વખતે મારો આખો પરિવાર એકઠો થયો હતો. એ વખતથી જ આ સ્ટોરી મારા દિમાગમાં હતી. જિયો સ્ટૂડિયોઝ અને દૃષ્યમ ફિલ્મ્સે મારા વિઝન પર વિશ્વાસ મૂક્યો એની હું આભારી છું. હવે દર્શકોના હાથમાં છે એને પ્રતિસાદ આપવો.’

વરુણ ધવનનાં બાળકો સાથે કામ કરવાની ઇચ્છા છે રાજપાલ યાદવને

મુંબઈ : રાજપાલ યાદવને વરુણ ધવનનાં બાળકો સાથે કામ કરવું છે. આ બન્ને ‘કૂલી નંબર 1’માં જોવા મળવાના છે. આ ફિલ્મ 1995માં આવેલી ગોવિંદા અને કરિશ્મા કપૂરની ‘કૂલી નંબર 1’ની રીમેક છે. એ ફિલ્મને ડેવિડ ધવને ડિરેક્ટ કરી હતી. તો આ રીમેકને પણ તેમણે જ ડિરેક્ટ કરી છે. 25 ડિસેમ્બરે આ ફિલ્મ ઑનલાઇન રિલીઝ થવાની છે. ફિલ્મમાં સારા અલી ખાન અને પરેશ રાવલ પણ જોવા મળશે.

 રાજપાલ યાદવે જણાવ્યું હતું કે વરુણે તેને એક વખત કહ્યું હતું કે ક્યારેક તો તે ભૂલી જાય છે કે રાજપાલ સિનિયર ઍક્ટર છે. વરુણ સાથે કામ કરવાના અનુભવને શૅર કરતાં રાજપાલ યાદવે કહ્યું હતું કે ‘આપણે સૌએ વરુણની મસ્તીખોર બાજુ જોઈ છે. વરુણે તેના કામથી તેની ફૅમિલીને માન-સન્માન અપાવ્યું છે. હું તારાં બાળકો સાથે પણ કામ કરીશ અને આજે જેવો છું એવો જ ત્યારે પણ રહીશ.’

પડોસન પર પ્રેમ ઊભરાઈ રહ્યો છે વિકીને

વિકી કૌશલને તેની પડોસન પર હેત ઊભરાઈ રહ્યું છે. એ પડોસન બીજું કોઈ નહીં પરંતુ એક ડૉગી છે. એનું નામ બેલા છે. વિકીએ એનો ફોટો શૅર કર્યો છે. ફોટોમાં તેણે ડૉગીને ઉઠાવી રાખી છે. ડૉગી પણ વિકીને વહાલ કરી રહી છે. વિકીના ચહેરા પર ખુશી છલકાઈ રહી છે. આ ફોટોને ઇન્સ્ટાગ્રામ પર શૅર કરીને વિકીએ કૅપ્શન આપી હતી કે પડોસન બેલા.

તાંડવના અનેક સીન્સ પટૌડી પૅલેસમાં શૂટ કરવામાં આવ્યા હતા : સુનીલ ગ્રોવર

મુંબઈ : (આઇ.એ.એન.એસ.) કૉમેડિયન અને ઍક્ટર સુનીલ ગ્રોવરે જણાવ્યું હતું કે તેની આવનારી વેબ-સિરીઝ ‘તાંડવ’ના કેટલાક સીન્સનું શૂટિંગ પટૌડી પૅલેસમાં કરવામાં આવ્યું હતું. અલી અબ્બાસ ઝફર ડિરેક્ટેડ આ સિરીઝમાં સુનીલ ગ્રોવરની સાથે સૈફ અલી ખાન, ડિમ્પલ કાપડિયા, ડિનો મોરિયા, ગૌહર ખાન, અમાયરા દસ્તુર, અનુપ સોની, હિતેન તેજવાણી અને તિગ્માંશુ ધુલિયા જોવા મળશે. પટૌડી પૅલેસ વિશે જણાવતાં સુનીલ ગ્રોવરે કહ્યું હતું કે ‘અમે પટૌડી પૅલેસમાં ઠંડીની ઋતુમાં અનેક સીન્સ શૂટ કર્યા હતા. આ ખૂબ જ સુંદર જગ્યા છે અને શિયાળામાં એની મુલાકાત જરૂર લેવી જોઈએ. ટાઇગર પટૌડી સાહેબ જ્યારે ક્રિકેટ રમતા હતા એ વખતના તેમના અનેક ફોટો હતા. અમે ઘણો વખત સુધી ત્યાં રોકાયા હતા. એથી ક્રિકેટ અમારો ફેવરિટ ટાઇમપાસ હતો. સૈફ અલી ખાન, અલી અબ્બાસ સર અને દરેક બ્રેક દરમ્યાન ક્રિકેટને એન્જૉય કરતા હતા. સૈફ ખૂબ જ નમ્ર વ્યક્તિ છે. અમે સાથે ક્રિકેટ રમતા હતા. ઑફ-સ્ક્રીન હું અને સૈફ ખૂબ સારા ફ્રેન્ડ્સ બની ગયા છીએ.’

વેરિકોઝ વેઇન્સને હટાવ્યા બાદ એના ઘા હજી પણ છે તાપસી પન્નુના પગ પર

મુંબઈ : (આઇ.એ.એન.એસ.) વેરિકોઝ વેઇન્સને ઑપરેશન કરીને દૂર કર્યા બાદ પણ એનાં નિશાન તાપસી પન્નુના પગ પર રહી ગયાં છે. ઑપરેશન કર્યાનાં ૬ અઠવાડિયાંમાં જ તેણે ફિલ્મની તૈયારી શરૂ કરી દીધી હતી. પોતાના પગ પરનાં નિશાનવાળો ફોટો ઇન્સ્ટાગ્રામ પર શૅર કરીને તાપસીએ કૅપ્શન આપી હતી કે ‘હું જ્યારે પણ આ ફોટો જોઉં છું તો મને યાદ આવી જાય છે કે કેવી રીતે મારી વેરિકોઝ વેઇન્સને ઑપરેશન દ્વારા દૂર કરવામાં આવી હતી અને એનાં ૬ અઠવાડિયાં બાદ જ મેં ફિલ્મની ટ્રેઇનિંગ શરૂ કરી દીધી હતી. હવે એ નિશાન મને ખરાબ નજરથી બચાવશે.’