બિગ બીને હાથ અડાડવાની પણ મનાઈ છે
અમિતાભ બચ્ચન - મનીષ પૉલ
અમિતાભ બચ્ચન અત્યારે ‘કૌન બનેગા કરોડપતિ’ હોસ્ટ કરે છે, પણ સેટ પર બિગ બીને આછોસરખો સ્પર્શ કરવાની પણ સખત મનાઈ ફરમાવાઈ છે. આ વાતનો અનુભવ થયો હમણાં મનીષ પૉલને. ઍક્ટર-ઍન્કર મનીષ પૉલ બિગ બીને મળવા માટે ‘કૌન બનેગા કરોડપતિ’ના સેટ પર ગયો ત્યારે તેને સ્ટ્રિક્ટલી દૂર રાખવામાં આવ્યો હતો. મનીષને અફસોસ એ વાતનો છે કે તે બિગ બીના પગને સ્પર્શીને આશીર્વાદ પણ લઈ શક્યો નહીં. અગાઉ એવું ક્યારેય બન્યું નથી કે મનીષ મહાનાયકને મળ્યો હોય અને એ પછી તેણે ચરણસ્પર્શ ન કર્યા હોય. પહેલી વાર એવું બન્યું કે મનીષ તેમને મળ્યો અને દૂરથી જ થોડી વાતો કરીને નીકળી ગયો.
ઍક્ચ્યુઅલી કોવિડ સામે લડીને ક્ષેમકુશળ રીતે બહાર આવનાર બિગ બીને ફરીથી કોઈ તકલીફ ન આવે એ માટે બચ્ચન-ફૅમિલી, બિગ બીનો સ્ટાફ, સોની ટીવી અને ‘કૌન બનેગા કરોડપતિ’નું યુનિટ જબરદસ્ત સ્ટ્રિક્ટ છે. માત્ર કન્ટેસ્ટન્ટ જ નહીં, યુનિટ અને ચૅનલનો સ્ટાફ પણ બિગ બીની નજીક જઈ નથી શકતો કે તેમને સ્પર્શી નથી શકતો.
