“હુમા કુરેશી સાથેના અફેર વિશે પૂરતા સબૂત હોય તો રજૂ કરો નહીંતર ચૂપ રહો”
મોહર બાસુ
સોહેલ ખાન આજકાલ મીડિયાથી દૂર રહેવાનું પસંદ કરે છે. મીડિયામાં સતત એવી વાતો ચાલી રહી છે કે હુમા કુરેશી સાથે વધી રહેલી નજદીકીને કારણે તેના લગ્નજીવનમાં ભંગાણ પડ્યું છે. આવા સમાચારોને કારણે જ તે મીડિયામાં તેના જીવન વિશેની કોઈ પણ વાત કરવાનું ટાળે છે.
ADVERTISEMENT
તે કહે છે, ‘પહેલી વાત તો એ કે આવી અફવા ક્યાંથી શરૂ થઈ એની જ મને ખબર નથી. હું એક માણસ છું અને તેથી જ આવી વાતો મને ખૂબ જ અસર કરે છે. તમે આવી વાતોને ત્યારે જ સફાઈ આપી શકો છો જ્યારે એમાં એક ટકો પણ સત્ય છુપાયેલું હોય. મેં મારા વિશે એવી વાતો વાંચી છે જેનાથી મને ખૂબ જ ગુસ્સો આવી જાય છે. જો તમે મારું નામ કોઈ સાથે જોડી રહ્યા હો તો એટલી હિંમત રાખો કે એ સમાચાર સાથે તમે નામ જણાવો. હું ક્યાં રહું છું અને શું કરું છું એ વિશે હોમવર્ક કરો અને પૂરી માહિતી રાખો. તમે મારા અફેરની જે વાત કરો છો એ વિશે તમારી પાસે પૂરતા સબૂત હોય તો રજૂ કરો, હું ચૂપ થઈ જઈશ. કોઈ પણ વસ્તુને જાણ્યા વગર તમને બધી જ ખબર છે એ રીતે લખવાનું બંધ કરો. સેલિબ્રિટીઝ મોટા ભાગે ન્યુઝપેપરમાં છપાતા ખોટા સમાચાર સાથે લડી રહી હોય છે.
ન્યુઝપેપરમાં જે ‘સૂત્રો દ્વારા જાણવા મળ્યું’ એવા સમાચાર આપવામાં આવે છે એ સૂત્રો કોણ હોય છે એ વિશે જ અમને ખબર નથી પડતી. મને મારા માટે કોઈ દુ:ખ નથી થતું, પરંતુ મને મારી પત્ની અને બાળકો માટે દુ:ખ થાય છે. મીડિયામાં સમાચાર માટે ગમે તેવી ગૉસિપ છાપવામાં આવે છે, પરંતુ તેઓ ભૂલી જાય છે કે અમારે પણ ઘરમાં મમ્મી-પપ્પા હોય છે. અમારાં બાળકો સ્કૂલમાં જાય છે અને તેમને અમારા લગ્નજીવન વિશે પૂછવામાં આવે છે. અમારાં બાળકો પર શું વીતે છે એનો તમને અંદાજ પણ નહીં હોય. હું એટલું જ કહેવા માગું છું કે તમે જે કંઈ લખો એ માટે તમારી પાસે પૂરતા સબૂત હોય તો જ લખો.’
