નેટફ્લિક્સની ત્રિભંગામાં રસપ્રદ સ્ટારકાસ્ટનો જમાવડો
અજય અને કાજોલ
ઑનલાઇન સ્ટ્રીમિંગ પ્લૅટફૉર્મ ‘નેટફ્લિક્સ’ માટે રેણુકા શહાણેના નિર્દેશનમાં બની રહેલી સિરીઝ ‘ત્રિભંગા’ની સ્ટારકાસ્ટ વધુ ને વધુ રોચક થઈ રહી છે.
એક જ ઘરમાં રહેતી ત્રણ જુદી-જુદી જનરેશનની સ્ત્રીઓની વાત કરતી ‘ત્રિભંગા’ વેબ-સિરીઝ દ્વારા જાણીતી અભિનેત્રી કાજોલ વેબ-વર્લ્ડમાં ડેબ્યુ કરી રહી છે. તેની સાથે દિગ્ગજ અભિનેત્રી તન્વી આઝમી અને ડિજિટલ દુનિયાની જાણીતી અભિનેત્રી મિથિલા પાલકર છે. અભિનેતા અજય દેવગન ‘ત્રિભંગા’નો કો-પ્રોડ્યુસર છે. હવે આ કાસ્ટમાં ‘દિલ્લી બેલી’, ‘નૌટંકી સાલા’ સહિતની ફિલ્મો અને TVFની વેબ-સિરીઝ ‘TVF ટ્રિપલિંગ’માં દેખાયેલો કુણાલ રૉય કપૂર તથા છેલ્લે અક્ષય ખન્ના અભિનીત ‘સેક્શન ૩૭૫’માં દેખાયેલો નિશાંક શર્મા પણ જોડાયો છે. ૧૯૮૦થી અત્યાર સુધીનો સમયગાળો આ સિરીઝમાં વણી લેવામાં આવશે. ‘હમ આપ હૈં કૌન’માં માધુરી દીક્ષિતની મોટી બહેન તરીકે ઘર-ઘર જાણીતી રેણુકા શહાણેએ જ ‘ત્રિભંગા’ની સ્ક્રિપ્ટ લખી છે. હાલમાં એનું શૂટિંગ ચાલી રહ્યું છે.
નિશાંક શર્માએ ઍમેઝૉન પ્રાઇમની ‘ગોરમિન્ટ’ અને વૂટની ઓરિજિનલ ‘અસૂરા’નું શૂટિંગ કર્યું છે તથા એ અક્ષયકુમારની ‘ગોલ્ડ’ અને ડાઇસ મીડિયાની સિરીઝ ‘વૉટ ધ ફૉક્સ’માં દેખાયો હતો.
