ઘૂમકેતુની કોસ્ટાર ઇલા અરુણની પ્રશંસા કરી નવાઝુદ્દીને
નવાઝુદ્દીન સિદ્દીકીએ ‘ઘૂમકેતુ’ની તેની કોસ્ટાર ઇલા અરુણની ખૂબ પ્રશંસા કરી છે. આ ફિલ્મ ZEE5 પર તાજેતરમાં જ રિલીઝ થઈ છે. ફિલ્મમાં નવાઝુદ્દીન બૉલીવુડમાં પોતાની કરીઅર બનાવવા આવે છે. ફિલ્મમાં ઇલા સાથેના એક સીનને લઈને નવાઝુદ્દીન મૂંઝવણમાં મુકાઈ જાય છે. ઇલા અરુણનાં વખાણ કરતાં નવાઝુદ્દીને કહ્યું હતું કે ‘ઇલાજીને ઍક્ટિંગની કુદરતી ભેટ મળેલી છે. મેં તેમની સાથે ત્રણ ફિલ્મોમાં કામ કર્યું છે. મને લાગે છે કે ભગવાનની તેમના પર ખૂબ કૃપા છે. તે ખૂબ જ સારી રીતે ગાય છે. તેમનો અવાજ અલગ છે. સાથે જ તે ખૂબ જ અદ્ભુત કો-ઍક્ટર છે. આ ફિલ્મમાં મારા કેટલાક કપરા પરંતુ અગત્યના સીન્સ ઇલાજી સાથે હતા. ફિલ્મમાં એક સીન મૉસ્કીટો નેટની અંદર હતો. મારા માટે એક પર્ફોર્મર તરીકે એ સીન થોડો અઘરો હતો. જોકે ઇલાજીએ એ બધું સરળ બનાવી દીધું હતું.’