નેટફ્લિક્સના શો વૉટ ધ લવમાં કરણ જોહર દિલના પ્રશ્નો ઉકેલશે
કરણ જોહર
આ વર્ષે નેટફ્લિક્સ પર ‘ઘોસ્ટ સ્ટોરીઝ’થી ખાતું ખોલાવ્યા બાદ ડિરેક્ટર કરણ જોહર ‘વૉટ ધ લવ’ નામનો શો લઈને આવી રહ્યો છે, જેમાં તે ફરી ‘કૉફી વિથ કરણ’ જેવા કન્સેપ્ટ સાથે પાછો આવી રહ્યો છે. જોકે આ વખતે તે માત્ર સેલિબ્રિટી સાથે નહીં, પણ સામાન્ય વ્યક્તિઓ સાથે પણ વાત કરશે. કરણ ‘વૉટ ધ લવ’ શોમાં લવ, રિલેશનશિપ, સેલ્ફ-લવ વગેરે વિશે પોતાના વિચાર રજૂ કરશે તેમ જ સ્પર્ધકોના પ્રશ્નોના ઉકેલ લાવવાની કોશિશ કરશે.
આ શોથી નેટફ્લિક્સ રોમૅન્સને અલગ રીતે વ્યાખ્યાયિત કરવા માગે છે. કરણ જોહર હોસ્ટ તરીકે હોય અને શોમાં સ્ટાર્સ ન હોય એવું કઈ રીતે બને? ‘વૉટ ધ લવ’માં સ્પર્ધકોની મદદ માટે હુમા કુરેશી, સૈફ અલી ખાન, અલી ફઝલ, પરિણીતી ચોપડા, અર્જુન કપૂર, સની લીઓની સહિતના સ્ટાર્સ જોવા મળશે. ૩૦ જાન્યુઆરી એટલે કે આવતી કાલે એ રિલીઝ થશે.
