નીલ નીતિન મુકેશ સાથેની વેબ-સિરીઝમાં જોવા મળશે ઈશા કોપ્પીકર
ઈશા કોપ્પીકર
ઈશા કોપ્પીકર વેબ-સિરીઝમાં નીલ નીતિન મુકેશની સાથે જોવા મળવાની છે. એમાં તે પોલીસના રોલમાં દેખાશે તો નીલ આરોપી બન્યો છે. ZEE5ની આ સિરીઝનું નામ હજી સુધી નક્કી નથી કરવામાં આવ્યું. આ સિરીઝને ‘ડરના મના હૈ’, ‘ડરના ઝરૂરી હૈ’ અને ‘ગાયબ’ના ડિરેક્ટર પ્રવાલ રમણ ડિરેક્ટ કરશે. આ વેબ-સિરીઝને લઈને ઈશા કોપ્પીકરે કહ્યું હતું કે ‘પ્રવાલ રમણે જ્યારે મને સ્ક્રિપ્ટ સંભળાવી તો એ મને ખૂબ અદ્ભુત લાગી હતી. હું વિચારતી હતી કે આ પ્લૉટ લોકોને જકડી રાખશે અને તેમને પણ વિચારતા કરી દેશે. હીરો અને વિલનની વચ્ચે ઉંદર અને બિલાડીની ગેમને ખૂબ જ સારી રીતે દેખાડવામાં આવશે. બન્ને એકસમાન રીતે ઇન્ટેલિજન્ટ પણ છે. પોલીસનો રોલ મારી પાસે સહજ રીતે આવે છે. આ રોલ એવો નથી જેને હંમેશાં અન્ય રાઇટર્સ લખતા આવ્યા છે. તે અપશબ્દો બોલતી પોલીસ નથી. જોરથી ચીસો પાડવામાં શક્તિ નથી સમાયેલી, પરંતુ આકર્ષણ અને પોઝિશનમાં છે.’