દયાભાભી પાછાં આવી ગયાં?

દયાભાભી પાછાં આવી ગયાં?

શોની સ્પર્ધક ઋતુજા જુનારકર દયાના ગેટ-અપમાં જોવા મળી હતી અને તેણે જેઠાલાલ એટલે કે દિલીપ જોશી સાથે ડાન્સ કર્યો હતો

ફિલ્મના તથા ટેલિવિઝનના કલાકારો પોતાની ફિલ્મ અને સિરિયલનું પ્રમોશન કરવા રિયલિટી શો પર અવારનવાર જતા હોય છે. સબ ટીવીનો અત્યંત લોકપ્રિય શો ‘તારક મેહતા કા ઉલ્ટા ચશ્મા’ ફિક્શન હોવા છતાં એમાં પણ ફિલ્મનું પ્રમોશન કરવા કલાકારો સમયાંતરે આવતા રહે છે, પણ આ વખતે ઊલટું થયું છે.          

થયું છે એવું કે ‘તારક મેહતા...’ની ટીમ સોની ટીવી પર ચાલતા શો ‘ઇન્ડિયાઝ બેસ્ટ ડાન્સર’માં દેખાવાની છે જેમાં જેઠાલાલ એટલે કે દિલીપ જોશીએ ઍક્ટ્રેસ અને ડાન્સર મલાઇકા અરોરા સાથે ડાન્સ કર્યો તો જેઠાલાલના બાપુજી ચંપકલાલ એટલે કે અમિત ભટ્ટ પણ શોમાં જોવા મળવાના છે. વાત એમ છે કે છેલ્લાં ૧૨ વર્ષથી ધમધોકાર ચાલી રહેલા ‘તારક મેહતા...’ ના ગયા મહિને 3000 એપિસોડ પૂરા થયા છે. એનું સેલિબ્રેશન કરવા ‘તારક મેહતા...’ની ટીમ ‘ઇન્ડિયાઝ બેસ્ટ ડાન્સર’માં પહોંચી હતી. શોની સ્પર્ધક ઋતુજા જુનારકર દયાના ગેટ-અપમાં જોવા મળી હતી અને તેણે જેઠાલાલ એટલે કે દિલીપ જોશી સાથે ડાન્સ કર્યો હતો. ઋતુજા અદ્દલ દયાભાભી એટલે દિશા વાકાણી જેવી લાગતી હતી. દિલીપ જોશીએ કહ્યું પણ ખરું કે એક સેકન્ડ માટે મને થયું કે દિશાજી (દયાબહેન) નાચી રહ્યાં છે!