'હમારી બહૂ સિલ્ક'નો દરેક કલાકાર સાવ નોધારો
‘હમારી બહૂ સિલ્ક’ યાદ છે તમને? બને કે ઝી ટીવીનો આ શો તમને અત્યારે યાદ ન હોય, કારણ કે આ શો ગયા વર્ષે જ ઝી ટીવીએ બંધ કરી દીધો, પણ અફસોસની વાત એ છે કે શો સાથે સંકળાયેલા તમામ ઍક્ટરોને માંડ ૧૦ ટકા જેટલું જ પેમેન્ટ મળ્યું છે અને ૯૦ ટકા જેટલું પેમેન્ટ પ્રોડ્યુસરે હજી સુધી ચૂકવ્યું નથી. આ શોમાં બે પ્રોડ્યુસર હતા. શો ચાલુ થયો ત્યારે ક્લે પિક્સર્ચ નામની કંપની પ્રોડ્યુસર હતી જ્યારે એ પછી શો સિલ્વર આઇવરી પ્રોડક્શને ટેકઓવર કર્યો, પણ પેમેન્ટ આપવાનું કામ બેમાંથી એક પણ પ્રોડક્શન-હાઉસે ન કર્યું. હવે બધા ઍક્ટરોએ એકસાથે મળીને પ્રોડ્યુસર અસોસિએશનમાં કમ્પલેઇન કરતાં આખી ફિલ્મ-ઇન્ડસ્ટ્રીમાં દેકારો બોલી ગયો છે.
ઇન્ડિયન ફિલ્મ ઍન્ડ ટીવી પ્રોડ્યુસર્સ કાઉન્સિલના ટીવી વિન્ગના ચૅરમૅન જેડી મજીઠિયાએ કહ્યું કે ‘ઍક્ટર્સને તેમની મહેનતના પૈસા મળવા જ જોઈએ અને અત્યારે જે સમય ચાલી રહ્યો છે એ સમયમાં તો પૈસા તેમને મળવા જ જોઈએ. અમે કાર્યવાહી કરી રહ્યા છીએ જેથી સૌકોઈને તાત્કાલિક પેમેન્ટ મળી જાય અને ભવિષ્યમાં આવું બીજા કોઈ સાથે ન બને એની તકેદારી પણ રાખીશું.’
