રણબીર કપૂર મીડિયા-ક્રૂ પર હુમલો કરવા ધસી ગયો
આ ઘટના બાબતે સૂત્રોએ જણાવ્યું હતું કે ‘રણબીર અને તેની કહેવાતી પ્રેમિકા કૅટરિના કૈફ તેમના બાંદરાના નવા ઘરમાં પ્રવેશ કરવા જતાં હતાં ત્યારે ટીવી-ક્રૂએ તેમનાં સહિયારાં દૃશ્યો ઝડપવાની કોશિશ કરી હતી. એ વખતે રણબીરે પિત્તો ગુમાવતાં તે મીડિયા-ટીમ તરફ ધસી ગયો હતો.’
રણબીરના વર્તન વિશે આ સૂત્રોએ જણાવ્યું હતું કે ‘બન્ને તેમના ઘરમાં પ્રવેશ કરતાં હતાં એ વખતે કોઈ ટીવી-ચૅનલની ટીમ તેમના ફોટોગ્રાફ્સ શૂટ કરતી હતી. એ જોઈને રોષે ભરાયેલો રણબીર તેમને ગાળો ભાંડતો-ભાંડતો તેમની દિશામાં ધસી ગયો હતો. ચૅનલના ક્રૂએ સામાન સમેટીને નાસવા માંડ્યું, પણ ગુસ્સો કાબૂમાં નહીં રાખી શકતો રણબીર તેમની પાછળ દોડ્યો પણ હતો. તેણે ચૅનલની કારમાં કૅમેરા-પર્સનની બૅકપૅક જોઈ તો એ પણ ઊંચકીને લઈ ગયો હતો.’
કપૂરખાનદાનના આ નબીરાએ કારના ડ્રાઇવરને ચૅનલના ક્રૂને ફોન કરીને બોલવવા કહ્યું હતું, પરંતુ ડ્રાઇવરે નોકરી પર પોતાનો પહેલો દિવસ હોવાનું કહીને માફી માગી હતી.
આ ઘટના બાબતે ટીવી-ક્રૂનાં નિકટનાં સૂત્રોએ જણાવ્યું હતું કે ‘રણબીર અતિશય ગુસ્સામાં હતો. તેણે મીડિયા-પર્સન્સને ભગાડવા માટે સાવ ભૂંડી ગાળો દીધી હતી. રણબીર અને કૅટરિના નવી જગ્યામાં રહેવા ગયાં ત્યાર પછી અનેક મીડિયા-પર્સન્સ તેમની સહિયારી તસવીરો ઝડપવા, શૂટ કરવા પ્રયત્નશીલ છે. બુધવારે રણબીરે તેમની દખલગીરીને હળવાશથી લીધી નહીં અને તે ચૅનલની ટીમ પાછળ એ લોકો દેખાતા બંધ ન થાય ત્યાં સુધી દોડ્યો. તેણે કારમાંથી જે બૅકપૅક ઉપાડી એમાં કૅમેરામૅનનું વૉલેટ અને એની બીજી પર્સનલ વસ્તુઓ હતી. આ ઘટના વિશે કમેન્ટ માટે રણબીર ઉપલબ્ધ નહોતો.
આ પહેલી વખત નથી
એક વખત તેણે ઍરપોર્ટ પર મીડિયા સામે પિત્તો ગુમાવ્યો હતો. ડિસેમ્બર-૨૦૧૩માં તેણે ન્યુઝ-ચૅનલના ક્રૂ સામે ગુસ્સે થઈને તેમનો કૅમેરા છીનવી લીધો હતો અને પછીથી પાછો પણ આપી દીધો હતો. ગયા વર્ષે એક પત્રકારે તેને કૅટરિનાને બર્થ-ડે ગિફ્ટ શું આપી એ બાબતે પૂછ્યું ત્યારે તેણે ગુસ્સામાં કહ્યું હતું કે ‘ઇંગ્લિશમાં એક ફ્રેઝ છે - માઇન્ડ યૉર ઓન બિઝનેસ.’
