ફૅશન ડિઝાઇનર સ્વપ્નિલ શિંદેએ સેક્સ ચેન્જ કરીને પોતાનું નામ રાખ્યું સાયશા

સેલિબ્રિટી ફૅશન ડિઝાઇનર સ્વપ્નિલ શિંદેએ લિંગ પરિવર્તન કરીને પોતાનું નામ સાયશા રાખ્યું છે. નવા વર્ષની નવી શરૂઆત સ્વપ્નિલે કંઈક અલગ રીતે કરી છે. તેણે નૅશનલ ઇન્સ્ટિટ્યૂટ ઑફ ટેક્સટાઇલથી ફૅશનની સ્ટડી કરી હતી. તે બૉલીવુડમાં ખૂબ જાણીતું નામ છે. સૌકોઈ તેના કામના પ્રશંસક છે. તેણે ‘સાહો’ માટે શ્રદ્ધા કપૂરના તમામ ડ્રેસ ડિઝાઇન કર્યા હતા. કરીના કપૂર ખાન પણ મોટા ભાગે તેના જ ડિઝાઇન કરેલા ડ્રેસ પહેરે છે. દીપિકા પાદુકોણે પણ ઇવેન્ટ્સમાં તેણે ડિઝાઇન કરેલા ડ્રેસ પહેર્યા છે. સ્વપ્નિલનું માનવું છે કે 6 વર્ષ પહેલાં જ તેને એવો અંદાજ આવી ગયો હતો કે લોકો ભલે તેને પુરુષ સમજતા હોય પરંતુ અંદરથી તેને અહેસાસ તો સ્ત્રી જેવો જ થતો હતો. એ વિશે વધુ જણાવતાં સ્વપ્નિલે કહ્યું હતું કે ‘કૉલેજમાં હું ખૂબ શરમાળ હતો. હું અંદર ને અંદર ઘૂંટાતો રહેતો હતો, પરંતુ ધીમે-ધીમે મને સમજમાં આવ્યું કે હું છોકરાઓ તરફ ખેંચાઈ રહ્યો છું. એ વિશે મેં જ્યારે એકાદ-બે જણ સાથે ચર્ચા કરી તો મને ધ્યાનમાં આવ્યું કે સમલૈંગિક હોવું કંઈ ખોટું નથી. એથી મેં પોતાને ગે સમજી લીધો. જોકે અત્યાર સુધી હું પોતાની જાતને ઓળખી નહોતો શક્યો.’