સ્પેશ્યલ ઑપ્સ યુનિવર્સની જાહેરાત કરી નીરજ પાન્ડેએ
નીરજ પાન્ડેએ જાહેરાત કરી છે કે તેઓ હવે ‘સ્પેશ્યલ ઑપ્સ યુનિવર્સ’ બનાવી રહ્યા છે. ‘સ્પેશ્યલ ઑપ્સ 1.5’માં કે. કે. મેનન એજન્ટ હિંમત સિંહ તરીકે ફરી આવી રહ્યો છે. આ વિશે નીરજ પાન્ડેએ કહ્યું હતું કે ‘અમે ‘સ્પેશ્યલ ઑપ્સ’ને એક યુનિવર્સ તરીકે રજૂ કરી રહ્યા છીએ જેની સ્ટોરી ટેલિંગ અને સીઝન એકદમ અલગ રહેશે. તેમ જ આ શોમાં દરેક કાસ્ટ ખૂબ જ અનોખી રીતે રજૂ કરવામાં આવશે. દર્શોકોના રિસ્પોન્સને કારણે અમે આ નવી જર્નીની શરૂઆત કરી છે. અમે ‘સ્પેશ્યલ ઑપ્સ 1.5’ને પ્રીક્વલ પણ નહીં અને સીક્વલ પણ નથી બનાવી રહ્યા. આ સીઝનમાં લોકો હિંમત સિંહની સ્ટોરીને ડીટેલમાં જોઈ શકશે. આ સીઝનની સ્ટોરીમાં હિંમત સિંહને નવો કેસ આપવામાં આવશે, પરંતુ એમ છતાં તે પાર્લમેન્ટ અટૅકની સ્ટોરીની આસપાસ રહેશે જેનાથી આ શોની શરૂઆત થઈ હતી. આ શોને ત્રણ એપિસોડમાં રજૂ કરવામાં આવશે અને એ લગભગ એક-એક કલાકના હશે.’
આ વિશે કે. કે. મેનને કહ્યું હતું કે ‘જો તમે એવું માનતા હો કે તમે હિંમત સિંહને પૂરેપૂરી રીતે જોઈ લીધો છે તો તમારે ‘સ્પેશ્યલ ઑપ્સ 1.5’ માટે રાહ જોવી જોઈએ. આ મારી અદ્ભુત સ્ટોરી છે. અમારી ‘સ્પેશ્યલ ઑપ્સ’ની આ પ્રીક્વલ નથી, પરંતુ એમાં એના ઇતિહાસને ખૂબ જ સારી રીતે દેખાડવામાં આવશે. એક ઍક્ટર તરીકે હું અનોખી સ્ટોરી કરવાનો આગ્રહ રાખું છું અને આ એમાંની જ એક છે.’
