આશા પારેખ સાથે શૂટિંગ કરતાં પહેલાં કેમ કાંદા ખાઈને જતા હતા ધર્મેન્દ્ર?
_d.jpg)
ધર્મેન્દ્ર
ધર્મેન્દ્ર તેમની ડ્રિન્ક કરવાની ટેવને કારણે આશા પારેખ સાથેની ફિલ્મ ‘આયે દિન બહાર કે’ના શૂટિંગ પર જતાં પહેલાં કાંદા ખાઈને જતા હતા. આ ફિલ્મનું શૂટિંગ દાર્જીલિંગમાં થયું હતું. ધર્મેન્દ્ર, આશા પારેખ અને વહીદા રહેમાન હાલમાં જ સોની પર આવતા ‘સુપરસ્ટાર સિંગર’ શોમાં પહોંચ્યાં હતાં. એ દરમ્યાન ફિલ્મના એ અનુભવ વિશે ધર્મેન્દ્રએ કહ્યું હતું કે ‘અમે દાર્જીલિંગમાં શૂટિંગ કરી રહ્યાં હતાં. ફિલ્મના પૅકઅપ બાદ પ્રોડ્યુસરો અને અન્ય ક્રૂ-મેમ્બર્સ મોડી રાત સુધી પાર્ટી કરતા હતા. હું પણ તેમની સાથે સામેલ થતો હતો. અમે ડ્રિન્ક કરતા હતા. જોકે સવારના ડ્રિન્કની સ્મેલ આવતી હતી. એથી એ સ્મેલને છુપાવવા માટે હું કાંદા ખાતો હતો. મેં તમને કહ્યું હતું કે હું આલ્કોહૉલની સ્મેલ છુપાવવા માટે કાંદા ખાતો હતો. જોકે તમે મને ડ્રિન્ક ન કરવાની સલાહ આપી હતી. તમારી સલાહ બાદ મેં ડ્રિન્ક કરવાનું બંધ કર્યું હતું. ત્યાર બાદ આપણે સારા ફ્રેન્ડ્સ બની ગયા હતા. આપણે એક ફૅમિલી જેવા બની ગયા છીએ. એ દિવસો તો ખૂબ જ સારા હતા. એ સુંદર યાદોને હાલમાં યાદ કરીને હું દુ:ખી થઈ જાઉં છું. જોકે એ વખતે મળેલા કામના એ અદ્ભુત અનુભવને યાદ કરીને હું ખુશ થાઉં છું.’
આ પણ વાંચો : રાજકુમાર રાવ સાથે ફિલ્મમાં કામ કરવાની મારી ઇચ્છા છે : સાન્યા મલ્હોત્રા
ADVERTISEMENT
ધર્મેન્દ્ર સાથે કામ કરવાના અનુભવને યાદ કરતાં આશા પારેખે કહ્યું હતું કે ‘ફિલ્મમાં એક ગીત હતું જેમાં ધર્મેન્દ્રને પાણીની અંદર ડાન્સ કરવાનો હતો. એ વખતે ઠંડી પણ ખૂબ હતી એને કારણે તેઓ ખૂબ થરથરી રહ્યા હતા. તે જ્યારે પણ પાણીની બહાર આવતા ત્યારે તેમને બ્રૅન્ડી ઑફર કરવામાં આવતી હતી. એ વખતે તેઓ મારી સામે જોતા હતા, કારણ કે મેં તેમને કહ્યું હતું કે જો તેઓ ડ્રિન્ક કરશે તો હું સેટ પરથી જતી રહીશ. આવું તો બે-ત્રણ દિવસ સુધી ચાલ્યા કર્યું, પરંતુ તેમણે મારું માન રાખતાં આલ્કોહૉલને હાથ પણ લગાડ્યો નહોતો.’
