અમિતાભ બચ્ચનના ટેમ્પલમાં કરવામાં આવી વર્ચ્યુઅલ પૂજા
વર્ચ્યુઅલ પૂજા
અમિતાભ બચ્ચનનો ગઈ કાલે જન્મદિવસ હોવાથી કલકત્તામાં આવેલા તેમના મંદિરમાં તેમની વર્ચ્યુઅલ પૂજા કરવામાં આવી હતી. અમિતાભ બચ્ચન ગઈ કાલે 78 વર્ષના થયા હતા. દર વર્ષે સાઉથ કલકત્તામાં આવેલા બેલીગુન્ગે ફેરી નજીક આવેલા અમિતાભ બચ્ચન ટેમ્પલમાં તેમની પૂજા કરવામાં આવે છે. આ દરમ્યાન તેમના ઘણા ચાહકોની હાજરી હોય છે. જોકે કોરોના વાઇરસને કારણે આ વખતે આ મંદિરના ફાઉન્ડર દ્વારા વર્ચ્યુઅલ પૂજાની વ્યવસ્થા કરવામાં આવી હતી. 2001થી દર વર્ષે આ દિવસે હોમ યજ્ઞ, પૂજા, ગરીબોને ભોગ અને પ્રસાદ આપવો અને કેક કાપવામાં આવે છે. આ વર્ષે આ પૂજામાં અમિતાભ બચ્ચનને પણ આમંત્રણ આપવામાં આવ્યું હતું, જેમાં હાજરી આપવાની તેમણે વાત કરી હતી. આ મંદિર દ્વારા આ વર્ષે એક હજાર માસ્ક, એક હજાર સૅનિટાઇઝર્સ અને 200 ગરીબ વ્યક્તિને અનાજ આપવામાં આવ્યાં હતાં.