કૉમેડી ગૉડ્સ ગિફ્ટ છે
& ટીવી પર આવતા કૉમેડી-શો ‘ભાભીજી ઘર પર હૈં!’ની કૉમેડી ઑડિયન્સને અનહદ પસંદ આવી છે અને એટલે જ પાંચ વર્ષથી આ શોએ આખી ચૅનલનો ભાર પોતાના ખભા પર લીધો છે. સિરિયલમાં વિભૂતિનું કૅરૅક્ટર કરતા આસિફ શેખ કૉમેડીની બાબતમાં બહુ ગંભીર છે. આસિફ કહે છે, ‘કૉમેડી ઈશ્વરની દેન છે. એ તમારી અંદરથી સહજ રીતે બહાર આવવી જોઈએ. મારી સાથે એવું જ થાય છે. મારે એની માટે કોઈ તૈયારી નથી કરવી પડતી કે જાતને ફોર્સ નથી આપવો પડતો. સહજ રીતે બહાર આવે એનું નામ જ કૉમેડી છે. મારી નજરમાં કૉમેડી સૌથી સ્પેશ્યલ જોનર છે. એ દેખાય સરળ છે, પણ આ કામ ખૂબ અઘરું છે.’
‘ભાભીજી ઘર પર હૈં!’ સાથે માત્ર રેગ્યુલર ઑડિયન્સ નહીં પણ યંગ ઑડિયન્સ પણ જોડાયેલું છે. આનું કારણ એ જ છે કે આસિફ પોતાની કૉમેડી માટે સતત સ્ટડી કરતો રહે છે. ઇન્ડિયન સ્ટૅન્ડઅપથી લઈને વર્લ્ડમાં ચાલતો અત્યારનો કૉમેડીનો જે ટ્રેન્ડ છે એને તે નિયમિત જુએ છે. અત્યારે લૉકડાઉનમાં પણ તે આ જ કામ કરે છે. આસિફ કહે છે, ‘વિશ્વાસ બહુ મહત્ત્વનો છે, ખાસ કરીને કૉમેડીમાં. તમે જેને ખુશ કરતા થઈ જાઓ તેનાં તમારા પાસેથી એક્સપેક્ટેશન વધવા માંડે છે. આ એક્સપેક્ટેશનને અકબંધ રાખવા માટે તમારે સતત સ્ટડી કરતાં રહેવું પડે.’
