આ બન્નેની ‘હ્યુમન’ ડિઝની + હૉટસ્ટાર પર ૧૪ જાન્યુઆરીએ રિલીઝ થવાની છે
શેફાલી શાહ
રામ કપૂરનું કહેવું છે કે શેફાલી શાહ કૅમેરાની પાછળ ‘ટોટલ ગૂફ બૉલ’ એટલે કે મજેદાર વ્યક્તિ છે. આ બન્નેએ ઘણી વખત સાથે કામ કર્યું છે. આ બન્નેની ‘હ્યુમન’ ડિઝની + હૉટસ્ટાર પર ૧૪ જાન્યુઆરીએ રિલીઝ થવાની છે. આ મેડિકલ થ્રિલર શોમાં કીર્તિ કુલ્હારી, વિશાલ જેઠવા, સીમા બિસ્વાસ, આદિત્ય શ્રીવાસ્તવ અને મોહન અગાશે પણ જોવા મળશે. સેટ પર શેફાલીના વર્તનને લઈને રામ કપૂરે કહ્યું હતું ‘શેફાલી સાથે કામ કરવાની હંમેશાંથી મજા આવે છે. બે-ત્રણ વખત મેં તેની સાથે કામ કર્યું છે. તે ખૂબ સારી વ્યક્તિ છે. ‘ટોટલ ગૂફ બૉલ’ છે. કૅમેરાની પાછળ તે ખૂબ મજાકમસ્તી કરે છે. તેની સાથે કામ કરતી વખતે મને પણ મજા આવે છે. એકબીજાની મજાક કરીએ છીએ અથવા તો કોઈની સાથે પ્રૅન્ક કરીએ છીએ. આ જ સારી રીત છે કામ કરવાની, કારણ કે એનાથી તમે હળવા બની જાઓ છો. કામ દરમ્યાન થોડી મજાકમસ્તી કરી શકો છો. મને એવું લાગે છે કે કામ કરવાની એ જ ખરી રીતભાત છે.’
